Þrjár hlutu Barnabókaverðlaun Reykjavíkurborgar

Þrjár listakonur tóku við Barnabókaverðlaunum Reykjavíkurborgar í dag; Ragnhildur Hólmgeirsdóttur fyrir bestu frumsömdu barnabókina,  Koparborgina, sem jafnframt er hennar fyrsta skáldsaga, Salka Guðmundsdóttir fyrir þýðingu sína á Skuggahliðinni og Villtu hliðinni eftir Sally Green og Linda Ólafsdóttir fyrir myndskreytingar sínar í bókinni Ugla og Fóa og maðurinn sem fór í hundana eftir Ólaf Hauk Símonarson. Þetta kemur fram í tilkynningu frá Reykjavíkurborg.

Dagur B. Eggertsson borgarstjóri afhenti verðlaunin við hátíðlega athöfn í Höfða. Þetta er í fyrsta sinn sem verðlaunin eru afhent með breyttu sniði en áður hafa skólayfirvöld í Reykjavík veitt barnabókaverðlaun fjörutíu og þrisvar sinnum. Verðlaunin voru nú veitt í þremur flokkum, en þau hafa verið sameinuð myndskreytiverðlaununum Dimmalimm.

Ragnhildur Hólmgeirsdóttir fékk barnabókaverðlaunin fyrir fyrstu skáldsögu sína, Koparborgin, sem Björt útgáfa gefur út. Í umsögn dómnefndar um verðlaunabókina segir m.a.; „Sagan er einstaklega vel skrifuð, spennandi og dulúðug og býður upp á galdra, hetjur og hrylling en líka vináttu og von.“

Salka Guðmundsdóttir fékk verðlaunin fyrir þýðingu sína á bókunum Skuggahliðin og Villta hliðin eftir bresku skáldkonuna Sally Green sem JPV útgáfa gefur út. Í umsögn dómnefndar um þýðinguna segir m.a.; „Sölku Guðmundsdóttur tekst með mikilli prýði að fanga myrkt og seiðandi andrúmsloft sögunnar yfir á íslensku, en í henni segir frá baráttu tveggja nornasamfélaga þar sem útskúfun og fordómar eru daglegt brauð.“

Myndskreytiverðlaunin komu í hlut Lindu Ólafsdóttur fyrir teikningar og myndir í bókinni Ugla og Fóa og maðurinn sem fór í hundana sem Sögur útgáfa gefur út. Í umsögn dómnefndar segir m.a.; „Gleðin í myndunum bætir í húmorinn í textanum og myndirnar segja líka sína eigin sögu.“

Við verðlaunaafhendinguna í Höfða í dag sungu nemendur í Tónlistarskólanum í Reykjavík lög úr óperunni Hlina Kóngssyni og sigurvegarar úr Stóru upplestrarkeppninni lásu upp úr verðlaunabókunum.

Barnabókaverðlaun Reykjavíkurborgar voru nú veitt í fyrsta sinn eftir að sameinuð voru Barnabókaverðlaun skóla- og frístundaráðs Reykjavíkur og Dimmalimm- myndskreytiverðlaunin. Verðlaunin  þjóna þeim tilgangi að vekja athygli á gildi góðra bókmennta í uppeldisstarfi og á metnaðarfullri útgáfu barnabóka. Valnefnd var að þessu sinni skipuð Brynhildi Björnsdóttur formanni, Jónu Björgu Sætran borgarfulltrúa, Gunnari Birni Melsted grunnskólakennara, Davíð Stefánssyni rithöfundi og Kristínu Arngrímsdóttur myndlistarkonu og rithöfundi.

• Blogga um frétt