Fleygja smámynt í hverinn

Deilt hefur verið um gjaldtöku við Geysi í Haukadal undanfarin misseri og í október síðastliðnum staðfesti Hæstiréttur dóm Héraðsdóms Suðurlands, um að meirihluta landeigenda Geysissvæðisins hefði verið óheimilt að hefja gjaldtöku af ferðamönnum um landið.

Svo virðist hins vegar sem margir ferðamenn vilji ólmir skilja þar eftir fé sitt, ef marka má fjölda smápeninga á botni hversins Blésa.

Lárus Kjartansson, sérfræðingur hjá Umhverfisstofnun og landvörður á Geysissvæðinu, segir í samtali við Morgunblaðið að þetta hafi verið hvimleitt vandamál undanfarin ár. „Við höfum kannski ekki verið með nógu góðar merkingar og þannig gæti þetta hafa farið framhjá fólki,“ segir Lárus.