Innlent | mbl | 3.8.2016 | 19:30 | Uppfært 20:18

Segir uppboð kvóta ekki koma til greina

Gunnar Bragi Sveinsson. mbl.is/Ómar Óskarsson

Sjávarútvegsráðherra og formaður atvinnuveganefndar Alþingis segja ekki koma til greina að bjóða fiskveiðikvóta upp eins og Færeyingar hafa gert. Erlendir aðilar myndu kaupa stærstan hluta og færri eignast kvóta. Hafa stjórnvöld í Færeyjum undanfarið gert tilraunir með uppboð á fiskveiðikvóta sem hefur skilað Færeyingum hærri fjárhæðum en veiðigjöld. Þetta kemur fram í frétt RÚV en Morgunblaðið fjallaði um uppboð aflaheimilda í Færeyjum í morgun.

Frétt mbl.is: Vonir landsstjórnar brugðust í upphafi

Kemur fram í frétt RÚV að sérfræðingar telji mikilvægt að Íslendingar læri af tilraunum Færeyinga og að leiðin gefi Færeyingum meiri arð af auðlindinni en Íslendingum.

Tekur Gunnar Bragi Sveinsson, sjávarútvegs- og landbúnaðarráðherra, undir með forsvarsmönnum sjávarútvegsfyrirtækja um að leið veiðigjalda sé vænlegri og segir það ekki koma til greina að bjóða upp kvóta á Íslandi. Fylgst verði þó áfram með gangi mála hjá Færeyingum.

Formaður atvinnuveganefndar Alþingis, Jón Gunnarsson, tekur undir mál sjávarútvegsráðherra en hann telur að kerfið sem Færeyingar vinna eftir gagnist ekki hér á landi þar sem útlendingar hafi keypt mikinn hluta þeirra aflaheimilda sem voru boðnar upp. Vill hann fremur horfa innanlands og vill jafnframt styrkja ákvæði um rétt sveitarfélaga til að verja hagsmuni sína.

Þá segir Jón við RÚV að hann hafi lagt fram tillögur sem „miða að því að hluti aflaheimilda verði á markaði af hálfu hins opinbera á hverju ári og það geti lagað stöðuna gagnvart kvótalitlum eða litlum og meðalstórum fyrirtækjum og aukið framboð á fiskmörkuðum.“

Segir sjávarútvegsráðherra þessar hugmyndir formanns atvinnuveganefndar vera áhugaverðar og þeim þurfi að velta fyrir sér.