„Draumur fólks um að aðrir en stóru fyrirtækin kæmust að reyndist vitleysa, á uppboðinu fengu þeir stóru allt,“ segir Jörgen Niclasen, fyrrverandi sjávarútvegsráðherra í Færeyjum og núverandi formaður Fólkaflokksins.
Í samtali í Morgunblaðinu í dag segir hann engan í Færeyjum þeirrar skoðunar að uppboð á aflaheimildum hafi tekist vel.
Í nokkur ár hefur verið prófað að setja smáhluta aflaheimilda á uppboð, þó ekki nema um tíu prósent aflaheimilda, og að mati Niclasen hefur það misheppnast algjörlega. Að hans sögn hafi eitt fyrirtæki keypt yfir 65% aflaheimildanna og það fyrirtæki sé með augljós tengsl við fjársterka aðila í Hollandi.