Innlent | mbl | 1.9.2016 | 14:41 | Uppfært 20:30

15% lækkun ekki skilað sér

Um er að ræða vörur á borð við vaska og salernisskálar. mbl.is/Þorkell Þorkelsson

Afnám vörugjalda á byggingarvörum í byrjun árs 2015 hefur ekki skilað sér til neytenda. Þvert á móti hefur undirvísitalan efni til viðhalds hækkað um 1,5% frá því í ágúst 2014. Á sama tíma hefur gengi krónunnar styrkst um 14%, en það hefði einnig átt að leiða til lækkunar umrædds vöruliðs.

Þetta kemur fram í tilkynningu frá Alþýðusambands Íslands. Um er að ræða ýmsar byggingavörur á borð við gólfefni, vaska og salernisskálar en ASÍ segir engar vísbendingar uppi um að afnám vörugjalda, lækkun á virðisaukaskatti og styrking krónunnar hafi skilað sér í lægra verði til neytenda.

„Hvar eru vörugjaldslækkanirnar af byggingavörum?“ spyr ASÍ.

„Um áramótin 2014/2015 voru vörugjöld á byggingarvörum afnumin. Verðlagseftirlit ASÍ áætlaði að verð þeirra byggingavara sem áður báru 15% vörugjöld hefðu í kjölfarið átt að lækka um 14%. Á sama tíma lækkaði einnig almennur virðisaukaskattur úr 25,5% í 24% og ef sú lækkun er tekin með í reikninginn hefði heildarlækkunin átt að nema um 15,2% á þeim vörum sem báru vörugjöld. Um er að ræða margskonar byggingavörur, m.a. gipsplötur, gólfefni, vaska og salernisskálar. Vísbendingar um verðþróun þessara vara má sjá í undirvísitölunni efni til viðhalds í vísitölu neysluverðs sem hefur frá því í ágúst 2014 hækkað um 1,5%. Samkvæmt því hefur afnám vörugjalda af byggingarvörum ekki skilað sér út í verðlag og neytendur eiga því inni skattalækkunina hjá söluaðilum.

Þegar rýnt er í vísitöluna fyrir efni til viðhalds sl. 2 ár sést að verð lækkar örlítið á fyrri hluta árs 2015 eða um 0,8% en sú lækkun nemur ekki einu sinni lækkun virðisaukaskattsins.

Frá því í ágúst 2014 þegar breytingarnar voru tilkynntar þar til nú í ágúst 2016 hefur efni til viðhalds hækkað um 1,5%. Á sama tíma hefur gengi krónunnar styrkst um 14% sem einnig hefði átt að leiða til lækkunar á þessum vörulið. Engar vísbendingar eru því í þessum tölum um að afnám vörugjalda, lækkun á virðisaukaskatti og styrking krónunnar hafi skilað sér í lægri verði á byggingavörum til neytenda.“