Innlent | mbl | 1.9.2016 | 11:06 | Uppfært 2.9.2016 9:19

Fleiri ofbeldisbrot á höfuðborgarsvæðinu

Sérstök áhersla var lögð á sýnileika og viðveru lögreglunnar í miðborginni um helgar. mbl.is/Júlíus Sigurjónsson

Ofbeldisbrotum fjölgaði á höfuðborgarsvæðinu í fyrra samkvæmt árskýrslu lögreglunnar á höfuðborgarsvæðinu, en embættinu bárust á annað þúsund tilkynninga um líkamsárásir. Breyttar áherslur lögreglunnar í heimilisofbeldismálum hafa þó einhver áhrif á afbrotatölfræðina.

Meiri háttar líkamsárásir voru um 150 talsins og er það ámóta fjöldi og árið á undan. Þar af leiddu tvær líkamsárásir til dauða, annars vegar í máli manns sem hafði orðið fyrir árás sambýliskonu sinnar í Hafnarfirði og hins vegar í alvarlegri líkamsárás í húsi við Miklubraut.

Mikil fjölgun í skráningu minni háttar líkamsárása

Minni háttar líkamsárásum fjölgaði þá mikið í fyrra, en í kringum 1.000 árásir voru skráðar 2015, eftir að hafa verið rétt innan við 700 árið á undan. Þessa miklu breytingu milli ára má þó rekja til breytinga í skráningu heimilisofbeldismála.

Hátt hlutfall ofbeldisbrota sem framin eru í miðborginni á sér hins vegar engar slíkar skýringar og hefur fjöldi þeirra haldist nokkuð jafn undanfarin ár.

Sé tölfræðin skoðuð yfir tímabilið frá 2007 til 2015 hefur ofbeldisbrotum í miðborginni fækkað um liðlega þriðjung, úr 534 brotum í 342. Ef tímabilið frá 2011 er hins vegar skoðað sést að brotafjöldinn hefur haldist nokkuð jafn á þeim tíma. Brotin eru um 300 að meðaltali á því tímabili, eða 25 kærur á mánuði, og eru flest brotanna framin á kvöldin og um helgar.

Auka öryggi og stytta viðbragðstíma

Við þessu hefur lögreglan reynt að sporna með sérstöku átaki er snýr að auknu sýnilegu eftirliti. Markmiðið er, að því er segir í skýrslunni, „m.a. að tryggja betra aðgengi að lögreglu og skemmri viðbragðstíma hennar og þar með að auka öryggi almennings á þessu svæði“.

Sérstök áhersla var því lögð á sýnileika og viðveru lögreglunnar í miðborginni um helgar og tók embætti ríkislögreglustjóra m.a. þátt í átakinu. Þannig var aukinn þungi settur í eftirlit lögreglu í miðborginni aðfaranótt laugardags og sunnudags milli kl. tvö og fimm, þar sem reynslan hefur sýnt að flest brotin eiga sér stað á þeim tíma.

Brotin eru misalvarleg með tilliti til meiðsla, allt frá minni háttar pústrum yfir í kýlingar og jafnvel spörk, og langflest eru þau tilviljanakennd og má rekja til ölvunar.

Í skýrslunni kemur fram að bæði lögregluliðin hafi verið sammála um „að verkefnið hefði gefist vel og árangurinn fælist ekki síður í þeim brotum sem var komið í veg fyrir með auknu, sýnilegu eftirliti á svæðinu“.