Húsbíll sprakk í Ártúni

Hluti Bíldshöfða í Reykjavík er nú lokaður vegna sprengingar sem varð þegar ferðmaður var að dæla metangasi á gaskút á húsbíl bensínstöðinni í Ártúni. Dælubílar frá slökkviliði höfuðborgarsvæðisins vinna að því að þrífa svæðið.

Slökkviliðinu á höfuðborgarsvæðinu barst tilkynning vegna málsins á öðrum tímanum í dag.

Samkvæmt upplýsingum frá Eggert Þór Kristóferssyni, forstjóra N1, var ferðamaður að dæla metani á gaskút á húsbíl á N1 Ártúni og kúturinn sprakk. 

mbl.is/RAX

„Þetta var svaka hvellur. Allt inni í bílnum fór á hvolf og út um allt,“ sagði sjónarvottur sem mbl.is ræddi við. Hann bætti því við að maðurinn sem var að dæla hafi skorist á fæti en ekki hefðu verið sjáanleg alvarleg slys á fólki. 

Upp hafi gosið megn metanlykt og svæðinu var lokað um leið.

Samkvæmt upplýsingum frá slökkviliðinu á höfuðborgarsvæðinu slösuðust þrír minniháttar þegar húsbíllinn sprakk. Mun fólkið hafa verið að dæla metani á gaskút þegar sprengingin varð. Bensínsstöðin er enn lokuð.

Viðbúnaður slökkviliðsins var mjög mikill. mbl.is/RAX

• 1 blogg um fréttina

Bloggað um fréttina

• Ásgrímur Hartmannsson: Hefur ISIS lýst yfir ábyrgð?