Innlent | mbl | 2.11.2016 | 19:14 | Uppfært 9.1.2017 20:47

Þingfararkaup á við 1,8 meðallaun

Alþingismenn Íslendinga eru nú launahæstir á meðal kollega sinna á Norðurlöndum. mbl.is/Ómar Óskarsson

Frá 1. október 2006 hefur þingfararkaup hækkað frá 503.051 krónu í 1.101.194 krónur, eða um 119 prósent. Á sama tíma hafa laun ráðherra hækkað úr 902.813 krónum í 1.826.273 krónur, eða um 102 prósent.

Samkvæmt útreikningum mbl.is, eftir gögnum Hagstofunnar, var þingfararkaup á við 1,31 meðallaun fullvinnandi manns á Íslandi árið 2006.

612 þúsund krónur í meðallaun

Í kjölfar úrskurðar kjararáðs, sem birtur var á mánudag, er ljóst að þingfararkaup er nú á við um það bil 1,8 meðallaun Íslendings sé miðað við tölur Hagstofunnar fyrir síðasta ár, þar sem þau eru sögð 612 þúsund krónur hjá fullvinnandi manni.

Rétt er að geta þess að sú krónutala kann að vera enn hærri á þessu ári, sem minnka myndi bilið. En sömuleiðis kunna laun einstakra þingmanna að vera enn hærri en sem nemur þingfararkaupinu einu saman, þar sem við bætast greiðslur fyrir formennsku stjórnmálaflokks, þingflokksformennsku og nefndaformennsku, svo aðeins séu nefnd nokkur dæmi.

Mánaðarlaun þingmanna og almennra launþega í krónum. Tölur yfir laun erlendra launþega eru frá 2010. Heimildir: Eurostat/Hagstofan

Ítalía sker sig úr

Á töflunni hér að ofan má glögglega sjá hvernig launabili þingmanna og almennra launþega háttar í völdum löndum Evrópu. Ítalía sker sig úr hvað varðar launamuninn, þar sem laun þingmanns eru á við 5,28 meðallaun hins almenna Ítala.

Neðst er þá Malta, þar sem aðeins rúmar rúmum tuttugu þúsund krónum á launum þingmanna og meðallaunum Maltverja.

Slaga upp í laun forsætisráðherra Finnlands

Forsætisráðherra Íslands kemst nálægt því að vera launahæstur allra kollega sinna á Norðurlöndum, en aðeins forsætisráðherra Danmerkur slær honum við með 2.059.000 krónur í mánaðarlaun á meðan sá íslenski fær kr. 2.022.000. Forsætisráðherra Finnlands er launalægstur, með 1.353.000 krónur í mánaðarlaun.

Laun íslenskra þingmanna höggva þannig nærri launum forsætisráðherrans, en þeir eru launahæstir kollega sinna á Norðurlöndum með 1.101.194 krónur í mánaðarlaun. Þeim næstir koma þingmenn norska Stórþingsins með 1.035.000 krónur.