Elti óþægar kindur upp á klettasyllu

Reimari Sigurjónssyni, bónda á Felli við Finnafjörð, var bjargað úr sjálfheldu í Gunnólfsvíkurfjalli í nótt. Reimar segist hafa verið rólegur á meðan á öllu stóð enda hafi veðrið verið ágætt og syllan nokkuð stór. Samkvæmt upplýsingum frá björgunarsveitinni Hafliða voru aðstæður erfiðar en björgunarstarf gekk vel.

Frétt mbl.is: Bjargað úr sjálfheldu

Frétt mbl.is: Sérþjálfaðir fjallabjörgunarmenn aðstoða

Reimar komst í sjálfheldu um þrjúleytið í gær þegar hann var að sækja þrjár kindur sem hann og Dagrún kona hans höfðu komið auga á í fjallinu.

 „Við spýttumst af stað hjónin, ætluðum bara rétt að skjótast og ná í þær. Svo urðu þær óþægar og fóru upp á syllur. Ég ætlaði náttúrulega að ná þeim og fór þá upp á syllurnar líka en var bara rétt kominn upp þegar ég sá að ég var strandaglópur,“ segir Reimar í samtali við mbl.is.

Við björgunarstarf í Gunnólfsvíkurfjalli. Mynd/Björgunarsveitin Súlur

Reimar hringdi sjálfur í neyðarlínuna og lýsti aðstæðum, en með honum á syllunni voru tveir border collie-hundar, þau Bolt og Frekna. „Það var ósköp notalegt að hafa þau. Ég sat með þau svona til skiptis.“ Reimar segir að hundarnir hafi bæði veitt honum félagsskap og haldið á honum hita ef honum kólnaði.

Reimar segist hafa verið rólegur á meðan á öllu stóð: „Það er sérgrein mín að vera rólegur. Mér var ekkert kalt þannig, bara svona smá hrollur í manni. Syllan var svo stór að ég gat labbað þarna 20-30 metra fram og til baka. Þetta var ekkert svona smá klettasnös.“

Reimar vill koma þakklæti til björgunarsveitanna, sem hann segir að hafi staðið sig mjög vel. 

Þyrla Landhelgisgæslunnar sótti björgunarsveitarmenn í Ásbyrgi. Mynd/Björgunarsveitin Súlur

Aðstæður erfiðar en allt gekk vel

Þórarinn Þórisson er slökkviliðsstjóri Langanesbyggðar og varaformaður björgunarsveitarinnar Hafliða. Í samtali við mbl.is segir Þórarinn að fyrstu menn hafi verið komnir á staðinn rétt fyrir klukkan fimm í gær en að björgunin hafi verið erfið viðureignar. „Það sem tafði þetta var myrkrið og hvað þetta var bratt og erfitt. Þeir voru komnir í fjöruna um klukkan korter í fimm og þá átti eftir að finna hann. Um hálfsex þegar við vorum ekki búnir að finna hann kölluðum við á þyrlu og allt það lið sem við gátum.“

Þórarinn segir það hafa bjargað málunum að bátarnir Geir ÞH 150 og Finni lýstu upp bjargið með kösturum. Rétt fyrir fjögur í nótt hafi fjallabjörgunarmenn svo að lokum komið Reimari niður. „Þeir fikruðu sig upp til hans, boruðu í bergið og settu línu til að tryggja niðurleiðina. Þetta var snarbratt og mjög laust í þessu.“

Þórarinn segir að þótt aðstæður hafi verið erfiðar hafi allir staðið sig gífurlega vel. Reimar hafi verið á syllu í um 300 metra hæð en í stöðugu talsambandi við björgunarsveitarmenn. Hann skilar kveðjum til allra sem komu að björguninni og þakkar góða aðstoð.

Björgunarsveitarmenn frá Vopnafirði, Akureyri og Reykjavík aðstoðuðu við leitina. Mynd/Súlur

Grillskálanum haldið opnum yfir nóttina

Grillskálanum á Þórshöfn er alla jafna lokað klukkan 20 á kvöldin en í gær var honum haldið opnum svo að björgunarsveitarmenn og aðrir gætu fengið mat og drykki á meðan á björgunarstarfinu stóð. Kapítóla Rán Jónsdóttir er annar eigenda Grillskálans, en hún situr jafnframt í stjórn björgunarsveitarinnar Hafliða.

Í samtali við mbl.is segir Kapítóla að tveir starfsmenn hafi staðið vaktina til miðnættis en þá hafi hún og maðurinn hennar tekið við. Um 20-25 manns fengu að borða í skálanum, en honum var ekki lokað fyrr en um sjöleytið í morgun.

• Blogga um frétt