Innlent | mbl | 27.1.2017 | 20:19

Sífellt fleiri nota nagladekk

Fleiri aka á bílum með negldum dekkjum en síðustu ár. mbl.is/Ómar

Nagladekkjum undir bifreiðum í Reykjavík hefur fjölgað undanfarið. Eigendur tæplega 27% þeirra bíla sem eru á nagladekkjum sögðu ferðalög út á land og yfir fjallvegi að vetri til vera helstu ástæðu þess að nagladekk urðu fyrir valinu.

Hlutfall ökutækja í Reykjavík á negldum dekkjum var 46,6% þegar talið var í fjórðu viku ársins 2017. Þetta kemur fram í tveimur könnunum sem Reykjavíkurborg hefur látið gera, að því er segir í tilkynningu frá borginni.

Reykjavíkurborg mælir ekki með negldum dekkjum í borginni. Helstu ástæðurnar eru meðal annars að uppspænt malbik er þáttur í svifryksmengun, nagladekk valda hljóðmengun og þau krefjast meira viðhalds gatna. Einnig er bent á að „vetrarþjónusta gatna í borginni [er] prýðileg.“

Í bókun umhverfis- og skipulagsráð frá 25. janúar segir: „Umhverfis og skipulagssviði er falið að koma með tillögur hvernig megi snúa þessari þróun við með aukinni fræðslu og hugsanlegu sérstöku gjaldi sem lagt yrði á notkun nagladekkja í takt við mengunarbótaregluna.“

Samkvæmt núgildandi umferðarlögum er sveitarfélögum ekki heimilt að hefja gjaldtöku vegna notkunar negldra hjólbarða.

Beinn kostnaður um 150 til 300 milljónir króna

Fulltrúar Samfylkingar, Vinstri grænna, áheyrnarfulltrúi Pírata og fulltrúi Framsóknar og flugvallarvina í umhverfis- og skipulagsráði lögðu fram bókun vegna málsins og telja ástæðu til að sporna gegn vaxandi nagladekkjanotkun í borginni.

Í henni kemur meðal annars fram að „beinn kostnaður sem hlýst af þessu sliti gatnanna talinn nema milli 150 til 300 milljónum króna.“ Í bókuninni er einnig bent á að kostnaðurinn leggist á alla borgarbúa einnig þá sem nota ekki nagladekk. Stóraukna nagladekkjanotkun megi einnig rekja til nýrra bílaleigubíla sem ferðmenn leigja.

„Umhverfis- og skipulagssvið mun nú kanna hvernig best er að vinna að því að fleiri velji dekk góð naglalaus vetrardekk. Áherslan verður á að bifreiðar sem einungis er verið að nota á höfuðborgarsvæðinu verði á naglalausum dekkjum," segir jafnframt í tilkynningu Reykjavíkurborgar.