Innlent | mbl | 4.3.2017 | 22:58 | Uppfært 5.3.2017 9:59

„Láta ekki bjóða sér þessa niðurlægingu“

mbl.is/RAX

Samtök atvinnurekenda á sunnanverðum Vestfjörðum (SASV) hafa sent frá sér harðorða ályktun þar sem mótmælt er boðuðum niðurskurði ríkisstjórnarinnar í samgöngumálum sem komi langharðast niður á Vestfjörðum. Þannig séu 1.200 milljónir króna, sem eyrnarmerktar hafi verið Vestfjarðavegi um Gufudalssveit, skornar niður til fulls og auk þess 400 milljónir króna sem fara hafi átt í vegbætur á Dynjandisheiði slegnar út af borðinu.

„Þótt 95 prósent af leiðinni til sunnanverðra Vestfjarða sé malbikuð eru þau 5 prósent sem út af standa í raun ófær og útiloka nánast flutninga með fólk og vörur. Helst mætti líkja þeim hluta við Kjalveg eins og hann var fyrir 30 árum síðan,“ segir enn fremur. Furðu veki að hægt sé að slá út af borðinu vegáætlun sem núverandi forsætisráðherra Bjarni Benediktsson hafi skrifað upp á. Íbúum sunnanverðra Vestfjarða finnist þeir hafa verið dregnir á asnaeyrunum fyrir kosningar með fyrirheitum um löngu tímabærar framkvæmdir.

„Það skýtur skökku við að draga lappirnar við nauðsynlegar úrbætur í vegamálum inn á svæði sem þrátt fyrir allt er eitt af fáum á landsbyggðinni þar sem verið hefur uppgangur eftir langvarandi stöðnun og íbúum tekið að fjölga að nýju og ný atvinnutækifæri að skapast í iðnaði, ferðaþjónustu og sjávarútvegi. Íbúar á sunnanverðum Vestfjörðum láta ekki bjóða sér þessa niðurlægingu,“ segir enn fremur.

Ályktunin í heild:

„Boðaður niðurskurður ríkisstjórnarinnar á samgönguáætlun er áfall fyrir fyrirtæki og almenning á sunnanverðum Vestfjörðum. Ekki er ofmælt að segja að samfélagið kraumi af reiði. Slegnar eru af framkvæmdir sem full sátt var um að þyrfti að ráðast í, og beðið hefur verið eftir árum saman, vegna Vestfjarðavegar.

Niðurskurðurinn kemur langharðast niður á Vestfjörðum þar sem 1.200 milljónir króna, sem voru á þessu ári eyrnamerktar Vestfjarðavegi um Gufudalssveit, eru skornar niður að fullu, auk þess sem slegnar eru út af borðinu 400 milljónir króna sem fara áttu í vegbætur í Dynjandisheiði.

Þótt 95 prósent af leiðinni til sunnanverðra Vestfjarða séu malbikuð eru þau 5 prósent sem út af standa í raun ófær og útiloka nánast flutninga með fólk og vörur. Helst mætti líkja þeim hluta við Kjalveg eins og hann var fyrir 30 árum. Þannig eru þær vegbætur sem beðið hefur verið eftir alvarlegur þröskuldur í vegi áframhaldandi uppbyggingar og viðgangs bæði atvinnulífs og mannlífs á svæðinu.

Fyrir kosningar sýndu því allir skilning og stuðning að ráðast yrði í að laga þennan veg um Gufudalssveit og vekur furðu að hægt sé að slá með þessum hætti út af borðinu vegáætlun sem forsætisráðherrann núverandi og fjármálaráðherra áður hafði skrifað upp á og þjóðarsátt var um. Íbúum sunnanverðra Vestfjarða líður eins og þeir hafi verið dregnir á asnaeyrunum fyrir kosningar með fyrirheitum um löngu tímabærar framkvæmdir.

Til marks um hversu mikið hitamál vegbætur á Vestfjarðavegi eru og hversu lengi hefur verið beðið eftir þeim má rifja upp þegar uppnám varð á fjölmennasta fundi í sögu sunnaverðra Vestfjarða haustið 2011 og meirihluti fundarmanna gekk á dyr og barði búsáhöld í mótmælaskyni við þá stefnumörkun innanríkisráðherra að Vestfjarðarvegur skyldi fara yfir tvo hálsa en ekki um láglendi.

Það skýtur skökku við að draga lappirnar við nauðsynlegar úrbætur í vegamálum inn á svæði sem þrátt fyrir allt er eitt af fáum á landsbyggðinni þar sem verið hefur uppgangur eftir langvarandi stöðnun og íbúum tekið að fjölga að nýju og ný atvinnutækifæri að skapast í iðnaði, ferðaþjónustu og sjávarútvegi. Íbúar á sunnanverðum Vestfjörðum láta ekki bjóða sér þessa niðurlægingu.“