Hafa safnað hátt í 700 þúsundum

Nemendur Menntaskólans á Akureyri sem snemma í morgun ýttu bíl af stað frá bílastæðinu við heimavist framhaldsskóla bæjarins, MA og VMA, eru komnir á leiðarenda, eftir að hafa farið Eyjafjarðarhringinn, sem svo er kallaður, 30 km leið - fram fjörðinn að vestan, að Hrafnagili, yfir brúna á Eyjafjarðará og til baka austan megin fjarðar.

Safnast hafa hátt í 700 þúsund krónur til styrktar Geðdeild Sjúkrahússins á Akureyri og söfnunin heldur áfram. Takist krökkunum að safna einni milljón króna verður merki skólans húðflúrað á einn nemandann.

Fjöldi nemenda og kennara tók á móti ferðalöngunum þegar þeir komu að Gamla skóla, eftir að hafa ýtt bílnum síðasta spölinn; upp þekktustu brekku bæjarins, Gilið, eins og neðsti hluti Kaupvangsstrætis er oftast kallaður, framhjá Akureyrarkirkju, upp Eyrarlandsveg og að gamla skólahúsinu.