Innlent | mbl | 15.3.2017 | 20:50 | Uppfært 21:09

Aðdragandi prófsins ýtti undir kvíða

Aldrei hafa jafnmargir verið með stuðningsúrræði í samræmdu prófunum og í ár. mbl.is/Eggert

Fjöldi nemenda sem nýtir sér stuðningsúrræði á samræmdum könnunarprófum hefur aukist jafnt og þétt undanfarin ár. Í nýlokinni fyrirlögn voru um 30% nemenda með stuðningsúrræði með lengdum próftíma og upplestri. Árið 2011 var hlutfallið 19,4%.

„Almennt glíma unglingar við meiri kvíða og vanlíðan í dag. Hvernig aðdraganda þess prófs var háttað varðandi upplýsingagjöf var ekki til þess fallið að draga úr kvíða hjá mörgum fyrir prófinu,“ segir Rósa Ingvarsdóttir, formaður kennarafélags Reykjavíkur og kennari á unglingastigi í Rimaskóla, aðspurð hvers vegna hún telji að nemendum sem nýta sér stuðningsúrræði hafi fjölgað.

Rósa segir margt hafa verið óljóst alveg fram á síðustu stundu, til dæmis hvaða þætti prófin myndu innihalda og hvort þau yrðu metin sem hluti af inntökuskilyrðum fyrir framhaldsskóla. Að kennarar gátu ekki veitt nemendum góðar upplýsingar fyrir prófið hafði ekki góð áhrif á nemendur, að sögn Rósu.

Frétt af mbl.is

30% nýttu sér stuðningsúrræði

mbl.is/Þórður

Þriðjungur nemenda með stuðningsúrræði

Í 9. bekk voru 4.141 nemandi skráðir í fyrri hluta prófsins og tóku samtals 3.747 nemendur próf, um 90%. Þar af nýttu sér 1.156 nemendur stuðningsúrræði með lengdum próftíma og upplestri sem er um 31% af þeim sem tóku prófið. Þetta kemur fram í samantekt Menntamálastofnunar á samræmdum könnunarprófum sem var lögð fram á fundi með allsherjar- og menntamálanefnd Alþingis í gær.

Svipaður fjöldi nemenda í 10. bekk nýtti sér stuðningsúrræði með lengdum próftíma og upplestri eða um 29% af þeim sem tóku prófið. Í 10. bekk voru 4.204 nemendur skráðir í fyrri hluta prófsins og tóku samtals 3.825 nemendur próf eða um 91%. Í seinni hluta þreyttu 3.800 nemendur próf og þar af 30% með stuðningi.

Þau stuðningsúrræði sem nemendur geta nýtt sér eru meðal annars stækkað letur, túlkun fyrirmæla fyrir nemendur með annað móðurmál en íslensku, viðbótarpróftími og lestrarstuðningur. Þeim nemendum sem eiga við lestrarörðugleika að stríða er gefinn kostur á upplestri. Sumir nemendur fengu að vera í minna rými og aðrir fengu lesaðstoð. Stefnt er að því að prófin verði einstaklingsmiðuð í framtíðinni.

Rósa bendir á að þrátt fyrir að þetta hlutfall sé nokkuð hátt þurfi um 24% nemenda aðstoð í námi og því sé þetta hlutfall á pari við það.

Kvíðinn að aukast í breyttu samfélagi

„Það er margt í okkar samfélagsgerð sem er breytt og veldur auknum kvíða,“ segir Rósa. Hún segir að þrátt fyrir að meira sé talað um kvíða í dag en fyrir 30 árum þegar hún byrjaði að kenna hefur hann samt aukist. Hún segir skólakerfið reyna að koma til móts við þessa nemendur.

„Það eru miklu fleiri nemendur sem eru hættir að mæta í skólann. Þetta er eitthvað sem við þurfum að hafa áhyggjur af,“ segir Rósa.