Veðja nú með Íslandi en ekki á móti
Setja bókamerki
„Sjóðirnir eru að veðja með bankanum [Arion banka] og Íslandi. Það er öfugt veðmál en fyrir hrun þegar veðjað var gegn Íslandi. Það er hægt að horfa á það jákvætt.“ Þetta segir Benedikt Jóhannesson fjármálaráðherra um fréttir þess efnis að þrír vogunarsjóðir og bandaríski fjárfestingarbankinn Goldman Sachs hafi keypt tæplega 30% hlut í Arion banka af dótturfélagi Kaupþings ehf. Tilkynnt var um kaupin fyrr í kvöld.
Benedikt segir í samtali við mbl.is að það sé viss viðurkenning að erlendir fjárfestar vilji eiga í innlendum banka og það sé breyting frá því fyrir hrun. Segist hann ekki telja að neinn alvöru fjárfestir hafi verið að íslensku viðskiptabönkunum fyrir hrun. Nefnir hann Sheikh Al Thani sem keypti 5% hlut í Kaupþingi rétt fyrir hrun og að hann hafi „reynst vera vafasamur kaupandi“.
Best að hafa langtímafjárfesta
Benedikt bendir á að þessi sala komi í kjölfar samnings sem fyrri ríkisstjórn gerði vegna stöðugleikaframlags frá slitabúum föllnu bankanna. Hann segist ekki vita hvort sjóðirnir líti á þetta sem langtímafjárfestingu en að hann taki undir með Fjármálaeftirlitinu um að telja best að að bönkum séu langtímafjárfestar.
Spurður hvort hann telji vogunarsjóði þá réttu hlutahafana segir Benedikt að skiljanlega sé fólk skeptískt á vogunarsjóði en það jákvæða sé að þeir séu svo sannarlega með þessu að veðja með Íslandi, en ekki á móti því eins og fyrir hrun.
Fer allt til niðurgreiðslu skulda ríkisins
Kaupverðið á þessum tæplega 30% hlut er um 48,8 milljarðar og verða þeir notaðir til að greiða inn á 84 milljarða króna skuldabréf ríkissjóðs sem var hluti af stöðugleikaframlagi Kaupþings sem samþykkt var við nauðasamninga félagsins. Benedikt segir að þessi upphæð muni öll fara til þess að greiða niður skuldir ríkissjóðs, enda hafi verið ákveðið að öll framlögin vegna stöðugleikaframlaganna færu í það.
Benedikt segir að þótt það sé mjög jákvætt að geta greitt niður skuldir þurfi að hafa í huga að skuldabréfið hafi borið 5% vexti sem hafi skilað sér í vaxtatekjum fyrir ríkissjóð.
„Erum í miðri hrinu“: Styttist í Eldvörp
Beint: Eldgos hafið við Stóra-Skógfell
Spara stórfé með olíukaupum ytra
Mæðgur dæmdar til að greiða 64 milljónir
Einar skorar á næstu ríkisstjórn
Mjög alvarlegt ef Njarðvíkuræð gefur sig
Á algjöru frumstigi eftir þrjár vikur af verkfalli