Innlent | mbl | 21.3.2017 | 15:45 | Uppfært 22.3.2017 5:18

Segja áfengisfrumvarpið ógn við almannaheill

mbl.is/Heiðar Kristjánsson

Áfengisfrumvarpið er ógn við almannaheill sem stangast á við stefnu stjórnvalda í áfengis- og vímuefnavörnum. Þá vinnur það gegn forvarnarstarfi sveitarfélaga auk þess að stangast á við aðgerðaráætlun Alþjóðaheilbrigðismálastofnunarinnar gegn lífsstílstengdum sjúkdómum sem og nýlega samþykktum heimsmarkmiðum Sameinuðu þjóðanna. Einnig vinnur frumvarpið gegn ákvæðum í barnasáttmálanum.

Þetta kemur fram í ályktun sem frístunda- og forvarnarfulltrúi Sandgerðisbæjar, félagsmálastjóri Sandgerðis, Garðs og Voga, íþrótta- og æskulýðsfulltrúi Garðs, frístunda- og menningarfulltrúi Voga, íþrótta- og tómstundafulltrúi Reykjanesbæjar og sviðsstjóri frístunda- og menningarsviðs Grindavíkurbæjar skrifuðu undir og sendu á fjölmiðla.

Hópurinn hvetur alþingismenn eindregið til þess að hafna frumvarpinu og benda á að embætti landlæknis, samtök lækna, heilbrigðisstarfsfólk og fjölmargir fagaðilar sem vinna að heilsueflingu og velferðarmálum hafi varað við þeirri breytingu sem felst í samþykkt frumvarpsins.

Tekið er fram að Íslendingar hafi unnið frábært forvarnastarf á undanförnum árum gegn áfengis- og vímuefnaneyslu barna og ungmenna, „náðst hefur árangur sem vakið hefur eftirtekt annarra þjóða.“

Bent er á að rannsóknir sýni að aukið aðgengi að áfengi leiði til aukinnar áfengisneyslu sérstaklega hjá ungmennum. Það á einnig til að auka tíðni einstaklingsbundinna og samfélagslegra vandamála samfara stórauknum samfélagslegum kostnaði.

Vitnað er í Alþjóðaheilbrigðisstofnunina sem segir árangursríkustu forvarnirnar gegn áfengi vera takmörkun á aðgengi, neyslustýringarskatt og bann við áfengisauglýsingum.

„Verði frumvarpið samþykkt hafa tvær af þremur virkustu forvarnaraðgerðum í áfengisforvörnum verið afnumdar,“ segir í álytkuninni. „Í frumvarpinu á að efla aðrar forvarnaraðgerðir sem rannsóknir hafa sýnt að hafa lítil sem engin áhrif á áfengisneyslu miðað við ofangreind atriði.“

Hópurinn óskar þess að alþingmenn taki alvarlega þær ábendingar og athugasemdir sem sérfræðingar hafa bent á og hagsmunir og velferð heildarinnar og lýðheilsusjónarmið verði höfð að leiðarljósi og frumvarpinu hafnað.

„Alþingismenn ættu að huga að hag íslenskra ungmenna í dag og í framtíðinni, frekar en rekstrarfræðilegum sjónarmiðum og breyta ekki sölufyrirkomulagi á áfengi sem er skynsamlegt eins og það er í dag. Við vildum gjarnan sjá alþingismenn beita sér fyrir því að koma allri sölu á hvers konar tóbaki inn í verslanir ÁTVR.

Einnig viljum við gera athugasemd við að málinu hafi ekki verið vísað til velferðarnefndar þar sem málið á heima, heldur eingöngu til allsherjar- og menntamálanefndar þar sem formenn beggja nefnda eru flutningsmenn áðurnefnds frumvarps,“ segir í ályktuninni en undir hana rita Rut Sigurðardóttir, frístunda- og forvarnafulltrúi Sandgerðisbæjar, Guðrún Björg Sigurðardóttir, félagsmálastjóri Sandgerðis, Garðs og Voga, Guðbrandur J. Stefánsson, íþrótta- og æskulýðsfulltrúi Garðs, Stefán Arinbjarnason, frístunda- og menningarfulltrúi Voga, Hafþór Barði Birgisson, íþrótta- og tómstundafulltrúi Reykjanesbæjar, og Björg Erlingsdóttir, sviðstjóri frístunda- og menningarsviðs Grindavíkurbæjar.