Gagnrýna söluna

Reykjavíkurborg seldi fasteignafélaginu Festi aðra af tveimur lóðum sem komu í hennar hlut við deiliskipulagningu íbúðahverfis á Gelgjutanga, í svokallaðri Vogabyggð 1. Guðfinna Jóhanna Guðmundsdóttir, borgarfulltrúi Framsóknar og flugvallarvina, gagnrýnir að það skuli hafa verið gert án útboðs.

Sérstök umræða verður um þetta mál á fundi borgarstjórnar á morgun, að ósk fulltrúa minnihlutans. Samningarnir við Festi voru samþykktir samhljóða í borgarráði.

Lóðin var seld Festi á tæpar 326 milljónir kr. og var verðið sagt grundvallað á mati tveggja löggiltra fasteignasala. Ekki fengust skýringar, þegar eftir því var leitað í gær hjá æðstu pólitísku embættismönnum borgarinnar, á því hvers vegna fleiri hefði ekki verið gefinn kostur á að bjóða í lóðina. Þar mun hafa ráðið það sjónarmið að heildstæð uppbygging hverfisins væri kostur og að markaðsverð hefði fengist fyrir eignina, að því er fram kemur í umfjöllun um mál þetta í Morgunblaðinu í dag.