Landspítalinn bregst við mistökunum

Landspítalinn segir að mikilvægt hafi verið að greina opinberlega frá hrinu mistaka sem eldri maður lenti í þegar hann var fluttur á Fjórðungs­sjúkra­húsið á Ak­ur­eyri. Það geri stofnuninni kleift að skoða ítarlega hvað hafi farið úrskeiðis. 

Frétt af mbl.is

Mistök á mistök ofan eftir skurðaðgerð

Á mbl.is var greint frá stöðufærslu Hafþórs Magna Sól­munds­sonar á Facebook þar sem hann fer yfir hrakfarir föður síns eft­ir aðgerð sem hann fór í vegna ill­kynja æxl­is. Meðal annars var faðir hans skil­inn eft­ir úti á flug­velli með opin skurðsár, stóma og í hjóla­stól í um klukku­stund þar sem hann beið eft­ir að kom­ast í al­menna flugið og þegar komið var til Ak­ur­eyrar kom svo í ljós að eng­inn sjúkra­bíll var á flug­vell­in­um.

Landspítalinn hefur verið í sambandi við fjölskylduna en segist ekki geta tjáð sig um einstaka mál. 

Yfirlýsing Landspítalans í heild:

Upplifun þessarar fjölskyldu af þjónustu okkar á Landspítala er ekki með þeim hætti sem við viljum. Það er okkur mikilvægt að þau völdu að deila þessari upplifun. Það gerir okkur kleift að skoða málið ítarlega og kanna hvað kann að hafa farið úrskeiðis. Það munum við gera og höfum upplýst fjölskylduna um það. Að öðru leyti getum við ekki tjáð okkur um einstök mál.

Landspítali tekur hvert einasta atvik alvarlega, rannsakar þau kerfisbundið og grípur í kjölfarið til úrvinnslu og viðeigandi aðgerða til að fyrirbyggja að mistök og frávik endurtaki sig. Landspítali hefur lagt þunga áherslu á uppbyggingu öflugrar öryggismenningar undanfarin ár undir yfirskriftinni „sjúklingurinn í öndvegi“. 

Í öryggismenningu felast sameiginleg gildi og viðhorf sem leiða til ákveðins vinnulags og hegðunar sem varða öryggismál. Öryggismenning sjúkrahúsa byggist á fjórum þáttum: atvikaskráningu, samskiptum, samstarfi og skuldbindingu stofnunar í öryggismálum.

• 1 blogg um fréttina

Bloggað um fréttina

• Þorsteinn Siglaugsson: Hvað ef þau hefðu ekki farið á Facebook?