Börn ganga berserksgang í Langholtshverfi

Ófremdarástand hefur verið í Langholtshverfinu síðustu vikur og mánuði þar sem hópur barna og unglinga hefur ítrekað gengið berserksgang, valdið töluverðu eignatjóni og jafnvel ráðist á jafnaldra sína. Lögreglan ætlar nú að taka málið föstum tökum og verður farið í sérstakar aðgerðir á næstunni til að sporna við frekari skemmdarverkum og ofbeldi.

Frétt af mbl.is

Ráðist á 14 ára dreng í Langholtshverfi

Frétt af mbl.is

Raunveruleg hætta á annarri árás

Íbúar í hverfinu hafa mikið talað um þetta ófremdarástand á lokaðri Facebook-síðu og fjöldi útkalla hefur verið óvenjumikill, að sögn lögreglu.

„Það hefur verið mikið unglingavesen þarna upp á síðkastið. Við ætlum að funda um aðgerðir í þessu hverfi, í Laugardalnum og þar í kring, í fyrramálið og ganga svo í það af fullum þunga að stöðva þessa krakka. Þetta eru bara grunnskólakrakkar og unglingar, 14 og 15 ára, jafnvel yngri,“ segir Guðmundur Páll Jónsson, fulltrúi hjá lögreglunni á höfuðborgarsvæðinu. Skemmdarverk hafa meðal annars verið unnin í Húsdýragarðinum. Þá hafa ljósker ítrekað verið brotin við Langholtskirkju og staurar sparkaðir niður.

Frétt af mbl.is

„Staurunum var gjörsamlega rústað“

Aðspurður hvort Guðmundur telji að um sömu krakka sé að ræða og réðust á 14 ára dreng í hverfinu fyrir tæpum tveimur vikum, vill hann ekki fullyrða um það en drengurinn hyggst kæra árásina.

Aukin gæsla hefur verið í hverfinu upp á síðkastið og lögreglan er því fljót á vettvang ef eitthvað kemur upp. Það hefur hins vegar ekki dugað til að stöðva skemmdarvargana. „Við erum vel vakandi yfir þessu, það er búið að vera svo mikið vesen á krökkunum þarna. En við ætlum að svæfa þetta núna,“ segir Guðmundur sem býst við að gæsla verið aukin enn frekar í hverfinu og að rætt verði við foreldra þeirra krakka hverra lögreglan hefur haft hendur í hári.

• 1 blogg um fréttina

Bloggað um fréttina

• Ómar Ragnarsson: Ekki unglingavandamál, heldur foreldravandamál?