Brynjar og Svandís vanhæf
Setja bókamerki
Brynjar Níelsson, þingmaður Sjálfstæðisflokksins, og Svandís Svavarsdóttir, þingmaður Vinstri grænna, stíga bæði til hliðar í stjórnskipunar- og eftirlitsnefnd Alþingis þegar skipun í embætti fimmtán dómara við Landsrétt verður þar tekin fyrir, vegna vanhæfis.
Eins og mbl.is greindi frá hefur Sigríður Á. Andersen dómsmálaráðherra afhent forseta Alþingis tillögu sína að skipun í embættin. Eru tillögur hennar ekki þær sömu og tillögur dómnefndar um umsækjendur, sem skilaði ráðherra umsögn sinni fyrr í mánuðinum.
Arnfríður Einarsdóttir héraðsdómari er á lista ráðherra, en hún er eiginkona Brynjars Níelssonar, sem er formaður stjórnskipunar- og eftirlitsnefndar Alþingis. Segir hann í samtali við mbl.is að það hafi legið fyrir frá upphafi að hann tæki ekki þátt í meðferð málsins fyrir nefndinni þar sem Arnfríður var á meðal umsækjenda.
Þá er Ástráður Haraldsson hæstaréttarlögmaður á lista dómnefndarinnar, en hann er fyrrverandi eiginmaður Svandísar Svavarsdóttur sem einnig á sæti í nefndinni. Lá einnig fyrir frá upphafi að hún tæki ekki þátt í meðferð málsins.
Málið afgreitt á Alþingi á miðvikudag
Njáll Trausti Friðbertsson, þingmaður Sjálfstæðisflokksins, mun gegna hlutverki formanns nefndarinnar í stað Brynjars, yfir þessu máli. Þá kemur Birgir Ármannsson, þingflokksformaður Sjálfstæðisflokksins, inn í nefndina sem staðgengill hans á meðan. Katrín Jakobsdóttir, formaður Vinsti grænna, kemur inn í stað Svandísar.
Að sögn Njáls mun nefndin funda klukkan níu í fyrramálið og fara yfir gögn málsins. Stefnt er svo að því að málið verði afgreitt fyrir þinginu á miðvikudag, með atkvæðagreiðslu.
Tveir nýir inn í framkvæmdastjórn Sýnar
„Algjört hörmungarástand“
Tugþúsundir sjálfboðaliða mættir á flóðasvæðið
„Umbjóðanda mínum er mjög létt“
Badenoch nýr leiðtogi Íhaldsflokksins
Kappakstursbraut í Reykjavík: Raunhæfur möguleiki?
Sex ár fyrir hnífstungu við Hofsvallagötu
