Slökkviliðið á Akureyri er enn að slökkva í glæðum í húsnæði bátasmiðjunnar Seigs við Goðanes. Rannsóknardeild lögreglunnar mun mæta á vettvang um leið og slökkviliðið telur það óhætt.
Þetta segir Sigurður Sigurðsson, varðstjóri hjá lögreglunni á Norðurlandi eystra.
Hann segir að svæðinu í kringum húsnæðið verði haldið lokuðu á meðan slökkviliðið er enn að störfum. „Lokunin verður minnkuð þegar þeir segja að það sé öruggt,“ segir hann.
Slökkvistarfið stóð yfir í alla nótt en mikinn og svartan reyk lagði yfir bæinn.