Saga hvarfakúta undan bifreiðum

Hvarfakútum hefur verið stolið undan sjö bifreiðum í umdæmi lögreglunnar á Suðurnesjum að undanförnu. Þetta er mikið tjón fyrir þá bíleigendur sem orðið hafa fyrir barðinu á þessum óprúttnu aðilum því nýr hvarfakútur kostar um 200 þúsund krónur.

Þetta kemur fram í tilkynningu frá lögreglunni á Suðurnesjum.

Fram kemur, að allir bílarnir sem kútarnir voru sagaðir undan hafi verið í Njarðvík, tveir hjá Heklu bílaumboði, einn hjá Nýsprautun og fjórir hjá KG bílum.

Fyrri þjófnaðurinn átti sér stað um miðjan síðasta mánuð þegar hvarfakútar voru sagaðir undan þremur bifreiðum og sá síðari var tilkynntur til lögreglu nú í vikunni þegar kútar voru sagaðir undan fjórum til viðbótar.

Þeir sem búa yfir upplýsingum um þessi mál eru beðnir um að hafa samband við lögreglu í síma 444-2200.

• 2 blogg um fréttina

Bloggað um fréttina

• Ómar Ragnarsson: Þeir bora líka í bensíngeyma.
• Ásgrímur Hartmannsson: Tjón og tjón...