Hjólakraftur er kominn framhjá Jökulsárlóni og stefnir nú að Skaftafelli. 110 manns í 11 liðum hjóla í kring um landið í WOW Cyclothon.

Klukkan fjögur í morgun birti loksins til eftir vont veður í gærkvöldi. Þegar liðin voru að hjóla fram hjá Djúpavogi blasti við þeim sólskin og var mikil hamingja meðal liðsmannanna með það. Ólafur J. Stefánsson, einn fjölmargra sjálfboðaliða sem fylgja krökkunum í Hjólakrafti, segir það vera mikið afrek hvað þau séu komin ótrúlega langt.

Hann hefur fylgt Hjólakrafti í keppninni síðastliðin þrjú skipti og segir það vera mjög skemmtilegt. „Þetta er ótrúleg upplifun“. Hann segir það vera magnað að sjá hvernig krakkarnir vinna saman sem ein heild.