Robert Downey, áður Róbert Árni Hreiðarsson, hefur ekki óskað eftir því að lögmannsréttindi sín verði endurvirkjuð, og er því ekki á skrá Lögmannafélags Íslands yfir lögmenn hér á landi. 

Mikið hef­ur verið fjallað um mál Roberts Dow­ney und­an­farið en hann fékk upp­reist æru um miðjan síðasta mánuð. Þrátt fyrir það endurvirkjast lögmannsréttindi hans ekki sjálfkrafa, en hann þarf að sækja um að fá þau að nýju hjá sýslumanninum á Norðurlandi eystra. Það hefur hann ekki gert.

Ekki með virk réttindi

Samkvæmt upplýsingum frá sýslumanninum á Norðurlandi eystra verða réttindi ekki virk þó að skilyrði sviptingar falli niður, nema óskað sé eftir því. Það hafi ekki verið gert í þessu tilviki. Liggja réttindin því óvirk inni.

Þá staðfestir Lögmannafélag Íslands að Robert Downey sé ekki með virk réttindi hjá félaginu.

Robert var dæmd­ur í þriggja ára fang­elsi árið 2008 fyr­ir kyn­ferðis­brot gegn fjór­um ung­lings­stúlk­um. Síðan Robert fékk upp­reist æru hafa tvær kon­ur til viðbót­ar stigið fram og greint frá of­beldi sem þær hafi verið beitt­ar af hálfu Ró­berts.

Brot hans gegn stúlk­un­um voru fram­in á ár­un­um 2005 og 2006 en hann tældi þrjár þeirra með blekk­ing­um og pen­inga­greiðslum til kyn­ferðismaka. Þær voru þá 14 og 15 ára. Hann komst í sam­band við stúlk­urn­ar í gegn­um netið og í flest­um til­vik­um sagðist hann vera tán­ings­pilt­ur.

Tengdar fréttir

Uppreist æru

Mátti afhenda gögn um uppreist æru

• Uppreist æru ekki í takt við nútímann
• Birt opinberlega í fyrsta sinn
• Almenningur getur sent inn umsögn
• Nokkur atriði ráða fyrningu brota

» Fleiri tengdar fréttir

• Blogga um frétt