Fara ekki fram á miklar launahækkanir
Setja bókamerki
Fyrsti fundur samninganefndar Skurðlæknafélags Íslands og samninganefndar ríkisins var haldinn í morgun. Kjarasamningur félagsins rennur út 31. ágúst.
Síðasti kjarasamningur skurðlækna var undirritaður í janúar árið 2015 eftir verkfall sem hafði mikil áhrif á starfsemi Landspítalans.
Launin viðhaldi verðgildi sínu
„Við viljum aðallega sjá til þess að okkar laun viðhaldi sínu verðgildi á samningstímanum. Við erum ekkert að fara fram á miklar launahækkanir. Þetta verður ekkert eins og síðustu viðræður sem snerust um leiðréttingu sem við töldum okkur hafa fengið fram,“ segir Eiríkur Orri Guðmundsson, formaður samninganefndar Skurðlæknafélags Íslands, spurður út i kröfur félagsins.
Hann telur að kröfurnar séu í takt við gang mála á vinnumarkaðnum. Það sem helst snýr að störfum skurðlækna í viðræðunum tengist meira öryggis- og tryggingamálum.
Eiríkur Orri kveðst vongóður um að samningaviðræðurnar muni ganga vel fyrir sig en næsti fundur er fyrirhugaður á föstudaginn.
Vantar skurðlækna á landsbyggðinni
Liðlega eitt hundrað skurðlæknar þiggja laun samkvæmt kjarasamningi Skurðlæknafélags Íslands en skurðlæknar eru einnig í Læknafélagi Íslands, sem samþykkti nýjan kjarasamning fyrr í sumar.
Spurður hvort skortur sé á skurðlæknum á landinu segir Eiríkur Orri það misjafnt eftir sérgreinum og sjúkrahúsum. Sums staðar segir hann vel mannað en annars staðar er þörf á fleirum.
„Það er aðallega landsbyggðin sem þyrfti liðsauka. Það er erfitt að vera eini skurðlæknirinn eða annar af tveimur hvar sem maður er. Það er mikil vaktabyrði og álag sem fylgir því,“ segir hann.
Í kappi við tímann að reyna að afstýra verkfalli
50 milljónir eiga að minnka svindl um 1 milljarð
„Við höldum áfram þangað til við erum búin“
77 ár á milli þess elsta og yngsta
Hulda saksóknari: „Tökum þetta ekki til greina“
Ása Ellerup flutt út og ætlar að selja húsið