Innlent | mbl | 12.9.2017 | 18:06 | Uppfært 19:02

Fékk meðmæli frá gömlum vinum

mbl.is

Lögmaðurinn Robert Downey, sem sakfelldur var á sínum tíma fyrir kynferðisbrot gegn þremur stúlkum, lagði fram meðmæli frá þremur vinum til margra ára þegar hann sótti um uppreist æru. Gögn sem varða umsókn Roberts, sem áður hét Róbert Árni Hreiðarsson, hafa verið birt á vef dómsmálaráðuneytisins í kjölfar niðurstöðu úrskurðarnefndar upplýsingamála.

„Þar sem nú eru liðin rúm tvö og hálft ár frá því að ég lauk afplánun og þar sem ég hef síðan lifað reglusömu og heiðarlegu lífi, leyfi ég mér að fara þess á leit, að mér verði veitt uppreisn æru að því er þetta varðar,“ segir í bréfi Roberts sem hann sendi til innanríkisráðuneytisins í september 2014 en bréfið var stílað á forseta Íslands.

Þeir sem veittu meðmælin voru Halldór Einarsson, Viðar Marel Jóhannsson kennari og Gautur Elvar Gunnarsson lögfræðingur og fulltrúi sýslumannsins í Reykjavík en þeir eiga það sameiginlegt að hafa þekkt Robert lengi.

„Ég hef þekkt Robert frá barnæsku og get ég fullyrt með góðri samvisku, að hann hefur hegðað sér óaðfinnanlega í lífi og starfi frá því, að hann kom úr fangelsi. Á milli okkar er mikil og góð ævarandi vinátta, traust og trúnaður,“ segir í umsögn Halldórs.

Viðar Marel segir dugnaður, ósérhlífni og hjálpsemi vera þau orð sem komi upp í hugann, þegar lýsa eigi Robert Downey. Þeir hafi þekkst í rúm 45 ár og aldrei hafi borið skugga á vinskap þeirra. Gott væri að eiga Robert að vini. Hann sé alltaf reiðubúinn að rétta hjálparhönd og vera vinur vina sinna.

„Hann hefur alla tíð reynst mér traustur og heiðarlegur bæði sem ráðgjafu og vinur. Ég og allir sem til þekkja munu geta borið vitni um, að Róbert Árni muni í alla staði reynast traustsins verður. Ég veit, að mannkostir hans munu reynast honum vel, og að slíkt, sem hann var dæmdur fyrir endurtekur sig ekki.“

Gautur Elvar segist hafa þekkt Robert um langa tíð og þekki hann af góðu einu, bæði persónulega og í starfi. „Ég mæli eindregið með því að Robert fái uppreisn æru og tel ég hann verðugan til þess. Þá veit ég til þess að hann hefur hagað sér óaðfinnanlega síðan hann fékk reynslulausn.“