Í fjárlagafrumvarpi ríkisstjórnarinnar sem var kynnt í morgun er gert ráð fyrir að skuldir ríkisins lækki um 36 milljarða á næsta ári og verði 859 milljarðar í lok ársins. Nettó skuldahlutfall ríkissjóðs verður með þessu 26,7% af landsframleiðslu og skuldir á hvern íbúa 2,6 milljónir.

Vaxtagreiðslur ríkissjóðs eru þó áfram mjög umfangsmikill liður á útgjaldahliðinni en áætlað er að þær muni nema um 73 milljörðum á næsta ári að meðtöldum reiknuðum vöxtum vegna lífeyrisskuldbindinga sem nema 14 milljörðum.

Samkvæmt lögum um opinber fjármál eiga skuldir ríkissjóðs og sveitarfélaga að vera undir 30% af landsframleiðslu og stefnt er að því að það náist árið 2019, en skuldir sveitarfélaga halda þessu hlutfalli enn yfir 30%.

Skuldir ríkissjóðs hafa lækkað mikið undanfarin ár og voru til að nefna um 1.450 milljarðar árið 2011. Í upphafi árs 2016 voru skuldirnar komnar niður í rúmlega 1.100 milljarða og á þessu ári hafa þær lækkað um 200 milljarða og standa í um 900 milljörðum.

Benedikt sagði á kynningarfundi með fjölmiðlum í morgun að ef bankarnir væru seldir væru skuldir ríkissjóðs ekki nema um 100 milljarðar. „Við erum í mjög öfundsverðri stöðu,“ sagði hann og bætti við að vandinn núna væri að verja þá góðu stöðu sem væri uppi og það væri hlutverk ríkisstjórnarinnar að einbeita sér að því.

Tengdar fréttir

Fjárlagafrumvarp 2018

Vegabréfsáritanir stóraukast á Indlandi

• Leiðir til að lyfta fólki upp úr fátækt
• Léttvínskassinn hækkar um 500 krónur
• Mælti með hóflegum auðlegðarskatti
• FA segir jöfnun gjalda yfirvarp

» Fleiri tengdar fréttir

• 1 blogg um fréttina

Bloggað um fréttina

• Ásgrímur Hartmannsson: Þeir gætu sparað meira: