Skerpa þarf á skilningi um hatursorðræðu

„Við þurfum að sýna hugrekki og þor og taka umræðuna,“ segir Þorsteinn Víglundsson, félags- og jafnréttisráðherra, um hatursorðræðu í íslensku samfélagi.

Þorsteinn hélt opnunarávarp á ráðstefnu Æskulýðsvettvangsins um hatursorðræðu í íslensku samfélagi sem stendur nú yfir í Hörpu.

Þorsteinn segir Íslendinga vera langt á eftir þegar kemur að skilgreiningu og viðbrögðum gegn hatursumræðu á netinu. „Við erum að dragast aftur úr.“ 

Þorsteinn segir stjórnvöld eiga mjög langt í land með að koma lagaumhverfinu í rétt horf og skerpa á skilningnum hér á landi um hatursorðræðu. Það sé í vinnslu og hafi hann stigið skref í þá átt að setja heildarlöggjöf í þessa átt hér á landi.

Ekki boðlegt að stilla flóttafólki og fátækum upp sem andstæðum kostum

Aukin fræðsla skiptir höfuðmáli í baráttunni gegn hatursorðræðu að mati Þorsteins. „Við erum í mjög mörgum tilvikum að glíma við fordóma sem stafa af reynsluleysi, oft vanhugsuð viðbrögð, fáfræði og vanþekkingu,“ segir hann.

Þorsteinn benti á umræðu máli sínu til stuðnings þar sem aðstoð stjórnvalda við flóttafólk hefur verið borin saman við stöðu heilbrigðis- og félagslega kerfisins á Íslandi. „Það er ekki boðlegt að stilla upp þessu sem andstæðum kostum. Að sjálfsögðu er hægt að sinna báðum hópum,“ segir Þorsteinn.

Þorsteinn Víglundsson, félags- og jafnréttisráðherra. mbl.is/Eggert Jóhannesson

„Við erum að rétta flóttafólki hjálparhönd, sem er að flýja skelfilegt ofbeldi. Við getum líka sinnt þeim sem minna mega sín og líða skort í samfélaginu. En tökum þetta ekki þangað. Tökum umræðuna á þann veg að okkur ber skylda til að gera þetta en hitt líka.“

Þorsteinn benti jafnframt á mikilvægi þess að bregðast við vanþekkingu og fordómum og svara þeim sem héldu úti hatursumræðu í athugasemdakerfum á frétta- og samfélagsmiðlum. „Þessir þræðir tæmast þegar einhver opinberar fordóma. Við eigum ekki að láta kveða okkur í kútinn. En stjórnvöld þurfa að gera það sem að þeim snýr.“

Þorsteinn segist vongóður um að málefni líkt og hatursumræða og hvernig megi taka á henni verði áberandi í umræðunni í komandi kosningabaráttu.  

• Blogga um frétt