„Sýnir fram á vanþekkingu og fordóma“

„Fullyrðing um að veiðar með haglabyssu séu ómannúðleg veiðiaðferð á ekki við nein rök að styðjast og fullyrðingar um slíkt úr lausu lofti gripnar,“ segir Indriði R. Grétarsson, formaður SKOTVÍS, í tilkynnningu.

Tilkynningin er skrifuð í tilefni þess að nýstofnuð samtök, Jarðarvinir, hafa lagt fram tvær kærur vegna veiða á rjúpum og hreindýrum.

Frétt mbl.is: Leggja fram kærur vegna veiðimennsku

Í tilkynningunni vill SKOTVÍS koma því á framfæri að veiðar séu nauðsynlegar til að framfylgja stjórnun á stofnstærð hreindýra. Skotveiðar þyki mannúðleg aðferð viðaflífinu dýra og séu samþykktar sem slíkar um allan heim. 

Ole Ant­on Bielt­vedt, stofn­andi Jarðar­vina, sagði við mbl.is í gær að ekki væri farið að lög­um um dýra­vel­ferð í mál­efn­um villtra dýra, en hann stofnaði sam­tök­in ásamt fjöl­skyldumeðlim­um sín­um í sum­ar. „Við Íslend­ing­ar erum göm­ul veiðimannaþjóð og það sit­ur enn í mönn­um að dýr­in séu bara eins og hlut­ir. Menn auðvitað þurftu að drepa fyrr á árum, til að kom­ast af, en nú er þetta bara orðið sport og skemmti­mál. Til­finn­inga­leysið er enn til staðar,“ seg­ir Ole Ant­on í sam­tali við mbl.is.

Veiðimaður á rjúpnaveiðum, með haglabyssu. mbl.is/Golli

Jarðvinir segja í kæru sinni að hrein­dýra­veiðar brjóti í bága við lög um dýra­vel­ferð, þar sem þær séu ekki gerðar af nauðsyn, held­ur séu fyrst og fremst skemmti­atriði þeirra sem þær stunda, en í lög­un­um seg­i að af­líf­un dýra sé ekki heim­il sem skemmti­atriði. „Ef þröngt væri um hrein­dýr­in á Aust­fjörðum og nær­ing ófull­nægj­andi, myndu þau sjálf­krafa dreifa sér víðar um landið. Því er ekki fyr­ir að fara. Hrein­dýr eru mein­laus og skaðlaus dýr, sem prýða og auðga nátt­úru lands­ins og líf­ríki,“ seg­ir í kær­unni.

Kálfar þurfi þrjá mánuði

Í kær­unni seg­ir að kálfar hreindýra þurfi á móður­mjólk að halda í allt að sex mánuði, en þegar hrein­dýra­veiðitíma­bilið hefj­ist hinn 1. ág­úst séu kálfarn­ir ein­göngu um tveggja mánaða gaml­ir.

Þessu hafnar SKOTVÍS og bendir á að kálfar séu um það bil þrjá mánuði á spena. „Niðurstaðan eftir að hafa lesið þessar kærur sýnir fram á vanþekkingu og fordóma þess sem það skrifar gagnvart veiðum og veiðistjórnun á Íslandi.“

Kæra vegna hrein­dýra­veiða bein­ist að Krist­ínu Lind Árna­dótt­ur, for­stjóra Um­hverf­is­stofn­un­ar og Björt Ólafs­dótt­ur, um­hverf­is- og auðlindaráðherra, og snýr meðal ann­ars að því að hreinkýr séu skotn­ar of snemma frá kálf­um sín­um. Kæra Jarðar­vina vegna rjúpna­veiða bein­ist að Jóni Gunn­ari Ottós­syni, for­stjóra Nátt­úru­fræðistofn­un­ar Íslands, Krist­ínu Lind Árna­dótt­ur hjá Um­hverf­is­stofn­un og Björt Ólafs­dótt­ur um­hverf­is­ráðherra.

Tilkynning SKOTVÍS í heild:

Vegna kæru Jarðarvina um veiðar á hreindýrum.

Stjórn SKOTVÍS vill koma eftirfarandi á framfæri.

1. Veiðar eru nauðsynlegar til að framfylgja stjórnun á stofnstærð hreindýra.

2. Skotveiðar þykja mannúðleg aðferð við aflífun dýra og eru samþykktar sem slíkar um allan heim.

3. Fullyrðing um að veiðar með haglabyssu séu ómannúðleg veiðiaðferð á ekki við nein rök að styðjast og fullyrðingar um slíkt úr lausu lofti gripnar.

4. Kálfar ganga ekki undir kúm í 6 mánuði, það er nær því að vera 3 mánuðir eða svipað og með sauðfé.

5. Niðurstaðan eftir að hafa lesið þessar kærur sýnir fram á vanþekkingu og fordóma þess sem það skrifar gagnvart veiðum og veiðistjórnun á Íslandi.

Allt tal um að stofn leiðrétti sig með tilheyrandi horfelli og gróðurskemmdum teljum við ekki vera til marks um dýravelferð, frekar væri hægt að segja að þarna væri um eina verstu tegund af dýrníði að ræða ef leggja á til að stofn leiðrétti sig af náttúrulegum orsökum ef offjölgun er um að ræða. Sá gróður sem að hreindýr lifa á er frekar seinvaxinn, og þar sem að hreindýr eru innflutt þá eiga þau sér engan náttúrulegan hemil eins og með úlfa eða önnur rándýr sem halda stofnum í ákveðinni stofnstærð annars staðar.
Að talað sé um skemmtiatriði finnst okkur vera ósmekklegt af hálfu „Jarðarvina“ og lýsir ennþá betur þeirri vanþekkingu sem Jarðarvinir hafa á þessum málaflokk.
SKOTVÍS harmar svona umræðu sem er ekki til þess fallin að skapa málefnalegur umræður og virðist vera eins til þess fallin að vekja athygli á fámennu samtökunum "Jarðarvinum" ....

Fyrir hönd SKOTVÍS.
Formaður
Indriði R.Grétarsson

• 1 blogg um fréttina

Bloggað um fréttina

• Jóhann Elíasson: HVAÐ SKYLDI KOMA NÆST FRÁ ÞESSUM "NÁTTÚRUVERNDAR AYATOLUM"????