„Ég vil að menn hinkri aðeins,“ segir Sigurður Gísli Pálmason, stjórnarformaður IKEA, um Hvalár­virkj­un í Árnes­hreppi á Strönd­um. Hann er einn þeirra sem gerðu athugasemd við fyrirhugaða virkjun og vill að aðrir möguleikar verði skoðaðir betur.

Alls hafa at­huga­semd­ir frá sex­tán aðilum og um­sagn­ir níu stofn­ana og sveit­ar­fé­laga borist vegna skipu­lagstil­lagna er varða Hvalár­virkj­un í Árnes­hreppi á Strönd­um. At­huga­semda­frest­ur vegna til­lagn­anna rann út 16. októ­ber.

Vest­ur­Verk, sem er í meiri­hluta­eigu HS Orku, hyggst reisa Hvalár­virkj­un á Ófeigs­fjarðar­heiði með því að byggja fimm stífl­ur við fjalla­vötn. Virkj­un­in yrði 55 mega­vött að afli og yrði raf­orkan að minnsta kosti fyrstu árin og ára­tug­ina að stór­um hluta flutt frá Vest­fjörðum.

Frétt af mbl.is

Reynt að bera fé á stjórnvald

Vill að gerð verði kostakönnun

„Óbyggð víðerni, náttúra og menning Árneshrepps eru einstakar auðlindir,“ segir Sigurður í athugasemd sinni en hann segir að nái uppbygging Hvalárvirkjunar fram að ganga muni verða óafturkræf breyting þar á.

Hann vill frekar að gerð verði kostakönnun á þeim möguleika að svæðinu verði breytt í þjóðgarð og mun hann ábyrgjast greiðslu vegna þess.

„Ég hef tröllatrú á hugmyndinni um þjóðgarð. Ég tel að það hafi verið sýnt fram á það í Vatnajökulsþjóðgarði og í þjóðgarðinum á Snæfellsnesi. Við höfum orðið vitni að því að á undraskömmum tíma hefur orðið til fjöldinn allur af störfum í kringum Vatnajökulsþjóðgarð. Þar eru tíu manns í heilsársstarfi og sumarstörfin skipta tugum,“ segir Sigurður.

Þjóðgarðurinn yrði einstakur

Hann segir að störfin í kringum þjóðgarð yrðu fleiri en þau sem vænta mætti með komu virkjunar og starfsemi þjóðgarðs gæti orðið aðdráttarafl fyrir fólk á öllum aldri, ekki síst brott flutt ungt fólk.

Sigurður bendir á að upphaflega hafi staðið til að fjögur störf yrðu tengd virkjuninni. „Núna kemur í ljós að þessuyerði stýrt með ljósleiðara úr Reykjavík og það yrði enginn í vinnu á Ströndum.“

Hann vill meina að virkjanakostinum hafi verið stillt upp sem eina kostinum fyrir sveitarstjórn Árneshrepps. „Ég vil endilega að menn doki aðeins við og láti fara fram alvöruathugun á þjóðgarðshugmynd,“ segir Sigurður og telur að þetta yrði einstakur garður.

„Þessi þjóðgarður yrði einstakur vegna þess að fólk væri með fasta búsetu innan hans. Þetta yrði eftirsóttur staður fyrir ferðamenn til að heimsækja. Mér finnst það augljóst að þetta er spennandi tækifæri fyrir samfélagið á Ströndum. Virkjunin er bara góð hugmynd fyrir strákana sem eiga VesturVerk og HS Orku.“

Tengdar fréttir

Náttúruauðlindir Íslands

Hagnaður OR dregst saman um 65,4%

• Frumvarp um þjóðgarð á miðhálendinu lagt fram í vor
• Uppbyggingu í Kerlingarfjöllum verði frestað
• Hafa safnað yfir 2.000 undirskriftum
• Landvernd safnar undirskriftum

» Fleiri tengdar fréttir

• 1 blogg um fréttina

Bloggað um fréttina

• Þorsteinn Siglaugsson: Rannsóknar er þörf