Ragnar kjörinn formaður KÍ

Ragnar Þór Pétursson hefur verið kjörinn formaður Kennarasambands Íslands. Hann hlaut 3.205 atkvæði eða 56,3%. Þrjú voru í framboði til formanns KÍ. Á kjörskrá voru 10.675  og greiddu 5.691 atkvæði, eða 53,3%. Atkvæðagreiðslan var rafræn; hún hófst á hádegi 1. nóvember og lauk klukkan 14 í dag.

Féllu atkvæði þannig: Guðríður Arnardóttir hlaut 1.944 atkvæði eða 34,2%, Ólafur Loftsson hlaut 392 atkvæði eða 6,9%, Ragnar Þór Pétursson hlaut 3.205 atkvæði eða 56,3% og voru auðir seðlar 150 eða 2,6%. Þetta kemur fram á vefsíðu KÍ. 

Ragnar Þór tekur við formennsku af Þórði Árna Hjaltested á VII þingi Kennarasambandsins sem fram fer í apríl á næsta ári. Þórður lætur þá af embætti en hann hefur gegnt formennsku í KÍ frá árinu 2011. Eiríkur Jónsson var fyrsti formaður KÍ, sat frá árinu 2000 til 2011. 

Frá vinstri: Ragnar Þór Pétursson, Ólafur Loftsson og Guðríður Arnardóttir. Skjáskot/Kennarasamband Íslands

• Blogga um frétt