Unnur Brá liggur undir feldi

„Þetta er bara eitthvað sem ég er að skoða,“ segir Unnur Brá Konráðsdóttir, fyrrverandi forseti Alþingis og þingmaður Sjálfstæðisflokksins. Hún íhugar að bjóða sig fram fyrir flokkinn í borgarstjórnarkosningum næsta vor. Fréttablaðið greindi fyrst frá.

Unnur var forseti Alþingis á síðasta kjörtímabili en datt út af þingi í kosningunum sem fóru fram í lok október.

„Prófkjörið er í lok janúar og það er ekki búið að auglýsa eftir framboðum þannig að ég hef smátíma í viðbót,“ segir Unnur. Leiðtogakjör Sjálfstæðisflokksins vegna borgarstjórnarkosninganna fer fram 27. janúar en opnað verður á framboð mánuði fyrr og hafa frambjóðendur þá tvær vikur til að tilkynna framboð.

„Þetta kemur allt í ljós,“ segir Unnur en hún segir að talsverður fjöldi fólks hafi heyrt í henni varðandi þetta mál. „Ég var sveitastjóri á Hvolsvelli áður en ég fór á þing. Sveitarstjórnarmálin eru skemmtilegur vettvangur.“

• 1 blogg um fréttina

Bloggað um fréttina

• Guðmundur Ásgeirsson: Fróðleikskorn um kjörgengisskilyrði