Komust langleiðina með leiðréttinguna
Setja bókamerki
Óskar Einarsson, formaður Flugvirkjafélags Íslands, segir að flugvirkjar hafi komist langleiðina með að ná fram þeirri leiðréttingu sem þeir fóru fram á í kjarasamningnum sem var undirritaður við Samtök atvinnulífsins í nótt vegna Icelandair.
Þar með lauk um tveggja sólarhringa verkfalli flugvirkja og var vinnustöðvun frestað um fjórar vikur.
Hann segir samninginn fela í sér hefðbundnar kjarabætur, þar á meðal hækkun grunnlauna, auk breytinga á vinnutilhögunum. Helst þurfti félagið að gefa eftir varðandi samningslengdina. Í júlí var lagt upp með eins árs samning en þess í stað gildir samningurinn til 31. desember 2019 og er til 28 mánaða ef reiknað er frá þeim tíma sem fyrri samningurinn rann út.
„Við vorum ekkert sérstaklega hrifnir af því að fara inn á það tímabil sem þessir stóru aðilar í landinu eru að semja á þessum tíma. Við vitum ekkert hvað er fram undan,“ segir Óskar, spurður hvers vegna flugvirkjar vildu styttri kjarasamning.
Eitthvað frá 20 prósentum
Ekki er ljóst hvenær atkvæðagreiðsla fer fram á meðal félagsmanna um nýja samninginn en að öllum líkindum fer hún fram á fundi annað kvöld.
Flugvirkjar fóru fram á í kringum 20% launahækkun á sínum tíma en Óskar segir niðurstöðuna í nótt hafa verið eitthvað frá því.
Eruð þið sáttir við samninginn? „Við erum það sáttir að við getum borið hann undir félagsmenn. Það þýðir ekkert að bera eitthvað á borð sem við teljum að menn vilji ekki.“
Viðræður vegna WOW air hefjast aftur
Flugvirkjar hjá WOW air hafa átt í viðræðum við fyrirtækið um nýjan kjarasamning en samningar losnuðu 31. október. Þeirri deilu hefur þó ekki verið vísað til ríkissáttasemjara. Að sögn Óskars voru þær viðræður settar til hliðar um stundarsakir vegna kjaraviðræðnanna í tengslum við Icelandair. Þær munu núna hefjast á nýjan leik.
Hjá Icelandair starfa 280 til 290 félagsmenn Flugvirkjafélagsins en rétt um 60 hjá WOW air.
Hópur fólks reyndi að komast að eldgosinu
Hentugt gos fyrst gýs á annað borð
Sólveig Anna furðar sig á aðferðum kennara
Fullvissa ferðamenn um að hér sé öruggt
Hraun kemur úr þremur gígum: Virknin stöðug
Drónamyndskeið frá hápunkti gossins í nótt
Dómur þyngdur um þrjú ár