Skoða riftun kjarasamninga

Gylfi Arnbjörnsson, forseti ASÍ, segir sambandið munu taka ákvörðun um það í febrúar hvort kjarasamningum verði rift. Miklar launahækkanir kjararáðs eigi þátt í að forsendur samninganna séu brostnar.

Tilefnið er m.a. nýir úrskurðir kjararáðs til handa prestum, próföstum, vígslubiskupum og biskup. „Geta okkar til að láta þetta hjá líða þverr með því að kjararáð heldur uppteknum hætti og skenkir æðstu embættismönnum okkar miklu meiri hækkanir en öðrum.“

Í umfjöllun um mál þetta í Morgunblaðinu í dag segir Gylfi framgöngu nýrrar ríkisstjórnar gera sér erfitt fyrir. Hljóðið hafi verið þungt í mönnum á miðstjórnarfundi ASÍ í gær.