Innlent | mbl | 12.1.2018 | 11:35 | Uppfært 13:15

Virkjunin skipti sköpum fyrir raforkuöryggi

VesturVerk á Ísafirði segir fullyrðingar Landverndar um áhrif Hvalárvirkjunar rangar. mbl.is/Golli

VesturVerk ehf. á Ísafirði, sem undirbýr gerð Hvalárvirkjunar í Ófeigsfirði á Ströndum, segir í yfirlýsingu til fjölmiðla að Hvalárvirkjun og ný flutningsmannvirki tengd henni muni skipta sköpum fyrir raforkuöryggi á Vestfjörðum.

Forsvarsmenn VesturVerks segja það rangt sem kemur fram í fréttatilkynningu Landverndar um skýrslu kanadíska ráðgjafarfyrirtækisins METSCO, að Hvalárvirkjun geri ekkert til að auka raforkuöryggi á Vestfjörðum.

Frétt af mbl.is

Tífalda má öryggi með jarðstrengjum

Í yfirlýsingu VesturVerks segir að aukin orkuframleiðsla á svæðinu sé forsenda fyrir auknu raforkuöryggi í fjórðungnum og undir það taki Landsnet, Orkubú Vestfjarða og Fjórðungssamband Vestfirðinga fyrir hönd vestfirskra sveitarfélaga.

Þá segir að skýrsla METSCO leggi eingöngu mat á raforkuöryggi út frá tveimur ólíkum kostum í flutningi á raforku; loftlínum eða jarðstrengjum. Ekkert mat sé lagt á virkjanakosti á Vestfjörðum eða fyrirætlanir VesturVerks um flutning raforku frá Hvalárvirkjun, né hvernig virkjunin muni tengjast flutningskerfi Landsnets.

Skýrslan fjalli ekki um áhrif Hvalárvirkjunar

Í raun sé Hvalárvirkjun einungis nefnd í einni málsgrein í inngangi skýrslunnar og þar setji höfundur fram þá skoðun sína að með loftlínum muni Hvalárvirkjun litlu bæta við raforkuöryggi svæðisins.

„Þessi skoðun er ekki frekar rökstudd og ekkert efnislegt mat lagt á getu Hvalárvirkjunar til að tryggja raforku til Vestfirðinga,“ segir í yfirlýsingunni.

Í skýrslu METSCO kemur fram að skýrsluhöfundar séu á þeirri skoðun að Hvalárvirkjun muni hafa tiltölulega lítil áhrif á afhendingaröryggi á raforku á Vestfjörðum, þar sem aðalógnin við afhendingaröryggi séu loftlínutengingar, sem séu viðkvæmar fyrir veðri og vindum. Beinskeyttari nálgun til þess að auka áreiðanleika raforkuflutnings sé að skipta út loftlínum fyrir jarðstrengi. Með því megi minnka rafmagnsleysi vegna storma og ísingar tífalt.

Landsnet hefur bent á að það sé óraunhæft að leggja nema lítinn hluta raflína á Vestfjörðum í jörð, vegna tæknilegra hindrana.

Frétt af mbl.is

Tæknilegar hindranir hamla

Í yfirlýsingu VesturVerks segir að Hvalárvirkjun verði tengd með jarðstreng yfir Ófeigsfjarðarheiði yfir í tengimannvirki við Ísafjarðardjúp.

„Meðal valkosta er að flytja orkuna þaðan með sæstreng yfir Ísafjarðardjúp og leggur Fjórðungssamband Vestfirðinga áherslu á þá leið. Sveitarfélög á Vestfjörðum hafa gert þá kröfu að Vestfirðir verði hringtengdir í gegnum nýjan afhendingarstað í Ísafjarðardjúpi með tengingu til Kollafjarðar og til Ísafjarðar. Sú sviðsmynd er ekki skoðuð í skýrslunni,“ segir ennfremur.

Í skýrslu METSCO er kostnaður við lagningu tæplega 200 kílómetra rafstrengs í jörðu áætlaður um 20 milljarðar króna. VesturVerk bendir á að engar nýjar tekjur muni hljótast af þeirri aðgerð einni og sér. Því sé vandséð að sá kostnaður verði greiddur af öðrum en hinu opinbera.