Íþróttir | Fótbolti | mbl | 23.1.2018 | 8:15 | Uppfært 9:04

Þjálfarinn starfar áfram

Knattspyrnuþjálfarinn hefur komið víða við á ferlinum og hvergi enst lengi. Wikipedia

Norski þjálfarinn sem lagði Hólmfríði Magnúsdóttur í einelti og beitti kynferðislegri áreitni mun halda núverandi þjálfarastarfi sínu. Þetta kemur fram í frétt norska blaðsins VG. Málið var tekið upp í stjórn knattspyrnufélagsins og þar ákveðið að hann verði áfram hjá félaginu.

Málið tengist hans fyrra starfi og ekki hafi verið kvartað yfir honum í því starfi sem hann gegnir nú. Lögmaður þjálfarans svaraði ekki fyrirspurnum VG um viðtal í gær.

Í skriflegu svari til VG segir formaður knattspyrnufélagsins að málið hafi verið rætt á fundi stjórnar í síðustu viku. Þar hafi verið samþykkt að grípa ekki til aðgerða og ríkir einhugur um það innan stjórnarinnar.

Málið sé afgreitt og það hafi verið gert í félaginu sem hann starfaði áður hjá. Stjórnarformaðurinn segir að kynferðisleg áreitni sé litin alvarlegum augum og þegar málið varðandi Hólmfríði kom upp í fjölmiðlum hafi hann rætt við þjálfarann um að þetta yrði ekki liðið. Taka verði faglega á málinu og það sé gert. Bæði varðandi þjálfarann sem starfsmann félagsins og taka upplýsingarnar sem hafa komið fram alvarlega.

Frétt VG

Frétt af mbl.is

Þjálfarinn var ógeðslegur

„Ég vil ekki halda of lengi utan um þig, þá verð ég graður,“ sagði þjálfari Hólmfríðar Magnúsdóttir sem þjálfaði hana í Noregi sumarið 2015. Hólmfríður er ein 62 íþróttakvenna sem birta frásagnir af kynbundinni mismunun, kynferðislegri áreitni og kynferðislegu ofbeldi.

Hún segir að þjálfarinn hafi þjálfað mörg lið og hafi verið þekktur. Hann byrjaði snemma að taka Hólmfríði fyrir og bannaði henni að fara heim í landsliðsverkefni að vori, því hún gæti verið meira úti og hitt hann. Þá endaði hann á því að faðma hana en sagðist ekki geta það of lengi, þá yrði hann of graður.

Í framhaldi af þessu hringdi þjálfarinn mikið í Hólmfríði og sendi henni skilaboð á hverjum einasta degi. „Tímabilið leið og hann lagði mig í einelti á æfingum, hótaði að reka mig heim af æfingu og naut þess að öskra á mig á hverri æfingu og inni í klefa fyrir framan allt liðið. Svo á milli æfinga var hann hringjandi og sendandi skilaboð sem endaði með því að ég svaraði oft og eiginlega alltaf rétt fyrir æfingu svo hann myndi ekki ganga á mig,“ skrifar Hólmfríður.

Hólmfríður fór að taka upp öll símtöl frá honum og sendi stjórn félagsins allar upptökur, sms og allt. Hún fór upp í sumarhús og var þar yfir helgi. Þjálfarinn hringdi margoft og lofaði öllu fögru en var rekinn þriðjudaginn eftir það. Umræddur þjálfari hafði áður þjálfað 17 lið og aldrei enst lengur hjá hverju liði en í eitt og hálft ár.