Verðum að vera brautryðjandi

„Ég er ánægð með að hafa stokkið á þetta tækifæri, en mig óraði ekki fyrir því hversu mikil áhrif það myndi hafa á líf mitt,“ segir Áslaug Arna Sigurbjörnsdóttir, ritari og þingmaður Sjálfstæðisflokksins, en hún sækist eftir endurkjöri í það embætti á landsfundi flokksins, sem haldinn verður helgina 16.-18. mars næstkomandi.

Það má segja að ákvörðun Áslaugar að bjóða sig fram í ritaraembættið hafi reynst afdrifarík, en á þeim rúmlega tveimur árum sem liðin eru hefur hún farið í prófkjör, náð kjöri á þing, orðið formaður allsherjar- og menntamálanefndar, lokið laganámi, farið aftur í kosningaslag og er nú formaður utanríkismálanefndar þingsins.

Þakklát fyrir tækifærið

Þetta hefur þó ekki verið eintómur gleðitími fyrir Áslaugu Örnu eða Sjálfstæðisflokkinn. „Við misstum fremstu stjórnmálakonu okkar, Ólöfu Nordal,“ segir Áslaug. Hún segist þakklát fyrir að hafa fengið tækifæri til þess að vinna með henni í forystu flokksins. „Ég lærði margt af henni og leit mjög upp til hennar. Á sama tíma var gaman að vinna með Ólöfu, því hún hugsaði málin alltaf til framtíðar, henni var annt um flokkinn sinn og að samfélagið tæki jákvæðum breytingum,“ segir Áslaug og bætir við að það skarð sem Ólöf hafi skilið eftir sig verði ekki auðfyllt.

Talið berst að stöðu kvenna í Sjálfstæðisflokknum, en nú sitja til dæmis bara fjórar konur fyrir flokkinn á þingi. Áslaug segir þetta óásættanlegt. „Það þarf að efla hlut kvenna í Sjálfstæðisflokknum. Við erum með gríðarmikið af konum í sveitarstjórnarmálunum, þar eru þær næstum því helmingur fulltrúa flokksins og það er gaman að fylgjast með þeim en í landsmálunum þarf að bæta úr.“

Áslaug bætir við að þetta sé hluti af framtíðarverkefnum Sjálfstæðisflokksins, hvernig hann geti laðað fleiri til fylgis við sjálfstæðisstefnuna. Það verkefni sé hins vegar ekki bara einskorðað við konur. „Núna gefst okkur tækifæri til þess að hugsa, hvers konar flokkur Sjálfstæðisflokkurinn vill vera til lengri tíma,“ segir Áslaug. Hún telur lykilinn að velgengni flokksins í gegnum tíðina liggja í þeirri fjölbreytni sem rúmast hafi þar. „Það þurfa að rúmast fleiri en eitt sjónarmið innan flokksins. Það hefur verið styrkur Sjálfstæðisflokksins í gegnum tíðina að þar hafa rúmast fjölbreyttar skoðanir fólks sem aðhylltist þó sömu grunnstefnuna,“ segir Áslaug.

Það er kraftur á landsfundi

Hún segir upplifunina á landsfundi vera einstaka. „Það er ótrúlegt að finna kraftinn í fólkinu og gaman að sjá það taka þátt í málefnavinnu flokksins og móta stefnuna,“ segir Áslaug. Sá kraftur birtist þó ekki síst í því að á landsfundi er tekist á, stundum hart. „Um suma hluti er og hefur verið hugmyndafræðilegur ágreiningur og hart tekist á um skoðanir, kerfisbreytingar, frelsismál og utanríkismál og svo mætti lengi áfram telja, en það er styrkur flokksins og bráðnauðsynlegt, að hafa þennan umræðuvettvang,“ segir Áslaug og bætir við að flokksmenn hafi alltaf getað sameinast um grunnstefnuna þrátt fyrir þessi átök, og farið samhentir af landsfundi. Ályktanir fundarins hafi síðan verið hafðar til hliðsjónar þegar kosningaáherslur og stjórnarsáttmálar þeir sem flokkurinn á aðild að eru mótaðir.

„Sjálfstæðisflokkurinn er og á að vera burðarafl í íslenskum stjórnmálum. Hann hefur staðið að kerfisbreytingum, auknu frelsi og tekið þátt í mikilvægustu ákvörðunum sem teknar hafa verið hér á landi, en við þurfum öll að gera betur til þess að flokkurinn verði áfram brautryðjandi fyrir nýjar hugmyndir, sem þó byggjast samt áfram á grundvallarstefnu Sjálfstæðisflokksins.“

Starf þingmannsins fjölbreytt

Áslaug Arna segir að staða sín sem ritari flokksins hafi reynst sér mjög lærdómsrík og hjálpað henni í þingstörfunum. „Ég hef farið á tugi funda út um allt land í störfum mínum sem ritari flokksins, þar hef ég talað við flokksmenn og fólk, heimsótt ólík byggðarlög og heyrt hvaða mál eru þar efst á baugi.“

Hún segir það vera ótrúlega mikilvægt fyrir kjörna fulltrúa að halda talsambandi við fólkið í landinu. „Það er fátt mikilvægara en að spyrja fólk í sinni heimabyggð hvað það vill. Það sem vantar mest upp á, er að það þarf að fá okkur kjörnu fulltrúana oftar þangað til þess að ræða málefnin, en fólkið vill líka að það sé betri upplýsingagjöf um það sem við erum að gera,“ segir Áslaug. „Við erum að vinna fyrir fólkið sem kýs okkur og þurfum að hlusta vel á það og fylgja því eftir í okkar vinnu.“

Hún segir ýmislegt í þingstörfunum koma fólki á óvart, sem ekki hafi kynnst því hvað felist í þeim. „Þegar ég kom sjálf inn í þetta umhverfi kom það mér kannski mest á óvart hvað það er mikil og góð vinna sem fer fram í nefndum þingsins. Þetta er auðvitað sérstakt vinnuumhverfi, en það eru gríðarlega mörg mál sem fara í gegnum nefndirnar í fullri sátt, en þeim málum er sjaldnast gert hátt undir höfði í umræðunni, því að átakamálin ná frekar athygli fjölmiðla og samfélagsins.“ Þá komi það fólki oft á óvart hvað starfið sé umfangsmikið. „Það felst ekki bara í því að sitja inni í þingsal og hlusta, heldur þurfum við líka að gefa okkur tíma til að hitta fólk og mæta á opna fundi, við erum að vinna að breytingatillögum á frumvörpum, rita ræður og greinar, taka svo þátt í þingstörfum og alþjóðastarfi, svo eru oft viðtöl og umræðuþættir um helgar,“ segir Áslaug. „Maður er einhvern veginn alltaf í vinnunni, en mér líður þó aldrei þannig því þetta starf er skemmtilegt. Þetta tækifæri til þess að hafa góð áhrif á samfélagið er ómetanlegt, mér finnst ótrúlega gaman að tala við fólk og heyra hvernig við getum þróað umhverfi okkar þannig að allir hafi það betra.“

Menntakerfið er undirstaðan

Í því samhengi nefnir Áslaug að eitt mikilvægasta málið sem ríki og sveitarfélög geti unnið að fyrir byggðir landsins sé að tryggja gott menntakerfi. Stefna Sjálfstæðisflokksins snúist um að tryggja öllum jöfn tækifæri til þess að fóta sig í samfélaginu. „Góðir skólar eru forsenda jafnra tækifæra fyrir alla hvaðan sem þeir koma, hvernig sem bakgrunnur þeirra er,“ segir Áslaug.

„Við þurfum að vera óhrædd að tala fyrir framförum og því hvernig við getum gert betur í menntakerfinu, því að það er langtímaverkefni. Þar eru miklar breytingar í vændum. Störf eru að breytast hratt og kröfur samfélagsins til fólks munu breytast og það þarf að tileinka sér nýja tækni og nýja kunnáttu samfara því.“

Þá sé ekki síst mikilvægt að grunnfögin séu í lagi, þannig að fólk útskrifist ekki úr grunnskóla án þess til dæmis að kunna að lesa sér til gagns. „Ef þú getur ekki lesið þér til gagns geturðu ekki aukið við kunnáttu þína og missir þannig af ýmsum tækifærum á lífsleiðinni,“ segir Áslaug.

„Menntakerfið er undirstaða samfélagsins og öflugt menntakerfi er forsenda lífskjara, forsenda fyrir fjölbreyttu atvinnulífi og hagvexti og menntakerfið okkar má ekki verða eftirbátur menntakerfis annarra landa.“

Ekki endilega ævistarf

Talið berst að framtíð Áslaugar sjálfrar í stjórnmálunum, hvort hún sjái fyrir sér að vera þar til lengri tíma. „Stjórnmálin hafa verið ákaflega skemmtilegur og gefandi vettvangur, og svo lengi sem mér finnst þetta skemmtilegt, þá verð ég þar, ef ég fæ fylgi og stuðning til,“ segir Áslaug. „Stjórnmálin eiga hins vegar ekki endilega að vera ævistarf. Við þurfum að vera opin fyrir því að fá fólk inn í þau og svo aftur út í önnur störf, og það hafi þá jafnvel tækifæri til þess að snúa aftur í stjórnmálin síðar. Við þurfum bæði að fá nýtt fólk inn, og einnig að halda í þá sem hafa víðtæka reynslu af stjórnmálastarfi.“

Áslaug segist njóta þess að ræða málefni við fólk og reyna að hafa áhrif á samfélagið. „Ég hef óbilandi trú á því að Ísland geti verið leiðandi land á svo mörgum sviðum, og með það að markmiði óttast ég ekki þau örlög að vera áfram í stjórnmálum í einhvern tíma. Tækifærin eru svo mörg sem við getum gripið til þess að búa til hér framúrskarandi samfélag. Svo lengi sem ég get haft góð áhrif og finn fyrir gleði í starfi mun ég gefa kost á mér.“