Ráðherrar birta úr dagbókum sínum

Ráðherrar munu birta yfirlit úr dagbókum sínum frá og með deginum í dag, en þetta var ákveðið á ríkisstjórnarfundi í morgun. Í tilkynningu frá Stjórnarráðinu kemur fram að við undirbúning málsins hafi verið leitað fyrirmynda, einkum á Norðurlöndunum og í Bretlandi.

Hver og einn ráðherra mun meta hversu miklar upplýsingar verða birtar um dagskrá hverrar viku, en stiklað verður á stóru í dagskrá ráðherra. Að meginstefnu er gert ráð fyrir að upplýsingar birtist um eftirfarandi: 

• Formlega fundi sem boðað er til með dagskrá eða þar sem ráðherra tekur á móti fulltrúum félagasamtaka og stofnana
• Formlega hádegisverði
• Viðburði þar sem ráðherra heldur erindi eða ávarp
• Fundi með fulltrúum erlendra ríkja (áður ótaldir)
• Stærri viðtöl við fjölmiðla sem ákveðin eru með nokkrum fyrirvara

Dagbækurnar má finna á undirsíðu undir hverjum og einum ráðherra á vef Stjórnarráðsins.

Þegar þetta er birt hefur Katrín Jakobsdóttir forsætisráðherra ein birt yfirlit úr dagbók sinni. Nær það bæði til þessarar viku og þeirrar síðustu.

• 1 blogg um fréttina

Bloggað um fréttina

• Þorsteinn H. Gunnarsson: Ráðherradagbók