Innlent | mbl | 21.3.2018 | 18:30 | Uppfært 21:43

Biskup framlengir leyfi sóknarprests

Grensáskirkja.

Biskup Íslands hefur ákveðið að framlengja leyfi Ólafs Jóhannssonar, sóknarprests Grensásprestakalls, ótímabundið á meðan mál hans er til ákvörðunar hjá embættinu.

Sóknarprestur braut af sér í starfi

Þetta kemur fram í tilkynningu á vef þjóðkirkjunnar. Ákvörðunin var tekin með hliðsjón af niðurstöðu úrskurðarnefndar þjóðkirkjunnar í málum nr. 1-5/2017.

„Biskup mun leitast við að vinna málið vandlega og gæta að réttindum allra hlutaðeigandi í þeirri vinnu,“ segir í tilkynningunni.

Sýndi ekki kynferðislega áreitni

Úrskurðarnefnd þjóðkirkjunnar taldi að séra Ólafur hafi gerst sekur um siðferðisbrot gegn tveimur konum. Biskupi er falið að ákveða refsingu hans.

Fimm konur kærðu athafnir séra Ólafs í sinn garð til kirkjunnar til úrlausnar.

Athafnir hans töldust sannaðar að hluta til í tveimur málum og metnar sem siðferðisbrot. Því var hafnað að í þeim fælist kynferðisleg áreitni.

Í þremur málanna var frásögn Ólafs lögð til grundvallar. Í máli 5 var ekkert talað um refsingu. Nefndin benti á að biskup hefði þegar afgreitt mál nr. 5 og skyldi meta sjálfur hvort lagaheimildir væru til að taka það mál upp að nýju.