Framkvæmdir við nýja ylströnd gætu hafist 2019

„Það eru örugglega mjög margir sem eru spenntir fyrir því að fá aðra ylströnd í borgina. Gufunesið er mjög spennandi svæði og ég held að þetta yrði frábær viðbót,“ segir Dagur B. Eggertsson borgarstjóri.

Morgunblaðið greindi frá því í október að á teikniborðinu væru tvær nýjar ylstrandir í Reykjavík; í Gufunesi og við Skarfaklett. Settur var á fót starfshópur með fulltrúum Veitna, ÍTR og borgarinnar og niðurstaða hans liggur nú fyrir: Þessar tvær staðsetningar verða settar í forgang.

Dagur segir í umfjöllun um mál þetta í Morgunblaðinu í dag, að ylströndin í Gufunesi sé nær í tíma en sú við Skarfaklett. Deiliskipulag fyrir Gufunesið verður auglýst í þessum mánuði en þar á sem kunnugt er að rísa kvikmyndaþorp og íbúabyggð. „Ráðgjafar okkar hafa viljað bæta ylstrandarhugmyndunum þar inn svo þær verði hluti af heildarhugsun og skipulagi hverfisins frá upphafi,“ segir borgarstjóri.