Þvottabjörninn, sem fannst við Hafnir á Reykjanesi um miðjan febrúarmánuð, var ekki með hundaæði. Það staðfesta sýni sem tekin voru úr birninum og send til rannsókna í Svíþjóð.
Jarðneskar leifar þvottabjarnarins eru núna í frysti hjá Tilraunastöð Háskóla Íslands í meinafræði að Keldum í Reykjavík og ráðgert er að rannsaka þær á næstunni með tilliti til dýraheilbrigðis og dýrasjúkdóma.
Hjalti Andrason, fræðslustjóri hjá Matvælastofnun, segir í Morgunblaðinu í dag, að ákveðið hafi verið að ganga fyrst úr skugga um hvort þvottabjörninn hafi verið með hundaæði.