„Ég er að hugsa um börnin okkar“

„Ég kalla eftir því að við gerum eitthvað róttækt í máli unga fólksins, í máli fíklanna okkar, áður en við leggjumst á sólarströnd í sumarfrí,“ sagði Inga Sæland, formaður Flokks fólksins, á Alþingi í dag í umræðum um störf þingsins þar sem hún gerði að umtalsefni sínu málefni ungs fólks sem ættu við fíkniefnavanda að stríða.

„Ég er að hugsa um börnin okkar. Það er kannski ekkert nýtt að sú kona sem hér stendur tali um börnin en ég bara get ekki annað því að þau eru mér svo mikið hjartans mál. Það sem er dapurlegt í stöðunni í dag er að mörg þeirra leiðast út í fíkn og eiga erfitt í samfélaginu okkar. Þau eru á löngum biðlista eftir því að geta fengið úrræði í sínum vímuefnavanda,“ sagði hún. Mörg þeirra dæu á þessum biðlistum.

„Það sorglega er að ég tek það til mín, sem einn af fulltrúum löggjafans tek ég það til mín, að við skulum ekki grípa kröftuglegar inn, koma með forvarnir og eyða þessum biðlistum og taka utan um það einasta sem hefur virkað almennilega hér, sem heitir SÁÁ. Að við skulum ekki veita nægt fjármagn til að eyða þessum biðlistum, að við skulum ekki sýna viljann í verki og að nú ætlum við að ganga inn í sumarið, í sumarfrí, þingmenn á sólarströnd, væntanlega, á meðan unga fólkið okkar verður enn hér heima deyjandi á biðlistum.“

• 1 blogg um fréttina

Bloggað um fréttina

• Wilhelm Emilsson: Um orðræðu