Treysta á guð og lukkuna

„Maður byrjar á þessu núna, það er ekkert annað að gera. Við vonum bara það besta,“ segir Ari Páll Ögmunds­son, bóndi í Stóru-Sand­vík í Árborg. Bændur á Suðurlandi eru farnir að slá tún sín þrátt fyrir bleytu enda, eins og Ari segir, er lítið annað í stöðunni.

Vætutíð í sumar hefur gert það að verkum að Ari hefur lítið getað slegið. Hann segist þó hafa náð góðum degi 20. júní en síðan þá hafi rignt mikið.

„Við byrjuðum aftur í morgun og getum vonandi gert eitthvað fram að helgi en spáin virðist sæmileg,“ segir Ari en veðurspár gera ráð fyrir þurru fram á föstudag á Suðurlandi.

„Það hefur verið rigning meira og minna í allt sumar. Núna förum við á fullt að heya og treystum á guð og lukkuna með það,“ segir Ari sem gerir ráð fyrir því að heyskapurinn verði blautari í ár en venjulega.

• 1 blogg um fréttina

Bloggað um fréttina

• Jóhannes Ragnarsson: Tréhestur, Sviptingur og fleiri hænsn og skoffín