Löng bið eftir salernisleyfi frá ráðuneytinu
Setja bókamerki
„Sorglegt að ráðuneytið hafi ekki klárað sitt,“ segir Þorsteinn Gunnarsson, sveitarstjóri Skútustaðahrepps, í samtali við blaðamann mbl.is. Hann segir að lokað verði fyrir baðferðir í Grjótagjá þar til undanþága fæst frá umhverfisráðuneytinu svo hægt verði að reisa salernisaðstöðu á svæðinu.
Landeigendur í landi Voga í Mývatnssveit hafa ákveðið að loka fyrir Kvennagjá í hellinum Grjótagjá en hellirinn hefur lengi verið vinsæll baðstaður. Ólöf Hallgrímsdóttir, einn landeigenda, sagði við Morgunblaðið í dag aðkomuna oft og tíðum mjög slæma og hafa þau því gripið til þess ráðs að loka fyrir Kvennagjána tímabundið til að vernda svæðið þar til nýtt deiluskipulag liggur fyrir.
Samkvæmt Þorsteini hefur nýtt deiliskipulag verið tilbúið af hálfu sveitarfélagsins síðan í apríl, en beðið er átekta umhverfisráðuneytisins vegna beiðni um undanþágu frá ákvæðum um vatnsverndarsvæði svo hægt verði að reisa salernisaðstöðu í lokuðu kerfi.
„Þrátt fyrir ítrekaðar tilraunir sveitarfélagsins til þess að fá málið afgreitt hefur undanþága ekki fengist enn,“ segir Þorsteinn. Hann segir ekki um stórfenglegar breytingar að ræða og að þetta snúist um „bætta aðstöðu ferðamanna og að færa bílastæðin fjær.“
„Landeigendur í Vogum hafa unnið að þessu deiliskipulagi í einhvern tíma og líka við Hverfjall. Þessi vinna hjá þeim er alveg til fyrirmyndar og sveitarfélagið hefur stutt við bakið á þeim í þessu, enda til eftirtekni hvernig sé haldið á þessu. Það er sorglegt að ráðuneytið hafi ekki klárað sitt svo hægt sé að klára skipulagið,“ segir Þorsteinn.
Sveitarstjórinn segist ekki þekkja til neinna áforma um gjaldtöku á svæðinu.
Rannsókn á menningarnæturmáli lokið
Ekki hægt að slá gosið út af borðinu strax
Fæðuöryggi: „Áttum mat í þrjár vikur“
Vinna hefst í dag við að reisa undirstöður
Börnin eiga að ýta við foreldrum sínum