Innlent | mbl | 3.12.2018 | 20:33 | Uppfært 20:56

Í beinni: Leiklestur á samtalinu á Klaustri

Leikhópur Borgarleikhússins leikles í kvöld valda hluta úr samtali þingmannanna sex sem tekið var upp á vínbarnum Klaustri í nóvember. mbl.is/Eggert Jóhannesson

Leikhópur Borgarleikhússins leikles í kvöld hluta úr samtali þingmanna á veitingastaðnum Klaustri. Samtalið var tekið upp og hafa brot úr því birst í fjölmiðlum síðustu daga. Leiklesturinn hefst klukkan 20:30 og fylgjast má með viðburðinum í beinni útsendingu á mbl.is:

Bergur Þór Ingólfsson leikstýrir og leikarar eru Edda Björg Eyjólfsdóttir, Sigrún Edda Björnsdóttir, Unnur Ösp Stefánsdóttir, Þuríður Blær Jóhannsdóttir, Þórunn Arna Kristjánsdóttir og Hilmar Guðjónsson.

Leikhópurinn mun fara í gegnum samtalið í réttri tímaröð og flytja þá kafla sem hafa birst opinberlega og telur handritið um 40 blaðsíður.

Frétt af mbl.is

Leiklestur „beint af kúnni“

Pallborðsumræður verða haldnar að leiklestrinum loknum. Haukur Ingi Jónasson, lektor við Háskólann í Reykjavík, stýrir umræðunum og þátttakendur verða Ingibjörg Dögg Kjartansdóttir, blaðamaður á Stundinni, Guðmundur Steingrímsson, heimspekingur, rithöfundur og fyrrverandi alþingismaður, Berglind Rós Magnúsdóttir, lektor við Háskóla Íslands, Bjarni Jónsson, sem starfaði sem framkvæmdastjóri Siðmenntar um árabil, og Björg Magnúsdóttir fjölmiðlakona.

Leikarar úr leikhópi Borgarleikhússins bregða sér í hlutverk Sigmundar Davíðs Gunnlaugssonar, Gunnars Braga Sveinssonar, Önnu Kolbrúnar Árnadóttur og Bergþórs Ólasonar, þingmanna Miðflokksins, í kvöld þegar samtal þingmannanna við Karl Gauta Hjaltason og Ólaf Ísleifsson, þingmenn Flokks fólksins, verður leiklesið í Borgarleikhúsinu.