Innlent | mbl | 5.2.2019 | 0:45 | Uppfært 4:27

Vegir lokist í nærri sólarhring

Búist er við því að loka þurfi vegum í grennd við höfuðborgarsvæðið í fyrramálið og að lokanir á Hellisheiði, Þrengslum og á Mosfellsheiði gætu varað í tæpan sólarhring. mbl.is/Eggert

Vegagerðin hefur uppfært áætlun sína um lokanir á vegum vegna óveðursins sem gengur upp að suðurströnd landsins í nótt.

Nú er gert ráð fyrir því að vegum um Hellisheiði, Þrengsli, Kjalarnes og Mosfellsheiði verði lokað eða þeir ófærir snemma í fyrramálið, en áður hafði áætlunin bara gert ráð fyrir lokunum síðdegis á morgun á milli Hvolsvallar og Víkur og í Öræfum.

Frétt af mbl.is

Búast við lokunum á Suðurlandi

Vegagerðin býst ekki við því að hægt verði að opna vegina um Hellisheiði, Þrengsli og Mosfellsheiði aftur fyrr en kl. 5 að morgni miðvikudags, en búist við að hægt verði að opna veginn um Kjalarnes kl. 12 á hádegi á morgun.

„Varað er við lélegu skyggni þegar lausamjöllin fer af stað í fyrramálið, víða SV-lands og austur með suðurströndinni,“ segir í ábendingu frá veðurfræðingi á vef Vegagerðarinnar, þar sem einnig kemur fram að það hláni á láglendi undir 200 metra hæð og að hætt sé við flughálku.