Klæddist einkennisjakka lögreglunnar

Héraðsdómur Reykjavíkur hefur dæmt karlmann í átta mánaða fangelsi og svipt hann ökurétti ævilangt eftir að hann var ákærður í tvígang með tæplega eins mánaðar millibili.

Fyrri ákæran var gefin út af héraðssaksóknara 14. desember í fyrra fyrir brot gegn valdstjórninni og vopnalögum með því að hafa föstudagskvöldið 8. júní 2018, utandyra við Lækjarvað í Reykjavík, verið íklæddur opinberlega, án heimildar, einkennisjakka sem er áskilinn íslensku lögreglunni sem hluti af einkennisbúningi hennar og fyrir að hafa í vörslum sínum útdraganlega kylfu sem er ekki ætluð til íþróttaiðkunar og ein handjárn úr máli.

Síðari ákæran var gefin út af lögreglustjóranum á höfuðborgarsvæðinu 10. janúar síðastliðinn meðal annars fyrir að aka fjórum sinnum sviptur ökurétti, þar af í þrjú skipti einnig undir áhrifum áfengis og fyrir að hafa haft í vörslum sínum 16,64 grömm af maríjúana.

Sakaferill mannsins nær aftur til ársins 2010 og hefur hann hlotið nokkra refsidóma fyrir fíkniefnalagabrot, umferðarlagabrot og ýmis hegningarlagabrot.

Ákærði játaði brot sín.

• 1 blogg um fréttina

Bloggað um fréttina

• Jóhannes Ragnarsson: En hvað með Hálfdán varðstjóra?