Gengið er til kosninga um verkfallsaðgerðir Eflingar í dag. Átta þúsund manns eru á kjörskrá. Það eru félagsmenn sem starfa undir samningi Samtaka atvinnulífsins og Eflingar um starfsemi hótela og veitingahúsa. Verði verkfall samþykkt leggja allt að 1.000 ræstingastarfsmenn á hótelum á höfuðborgarsvæðinu og nágrenni niður störf 8. mars.

Kosningin er rafræn og stendur í þrjá og hálfan sólarhring. Einnig geta félagsmenn kosið inni í þar til gerðum bíl, sem keyrir á milli vinnustaða næstu daga, að því er fram kemur í umfjöllun um kjaramálin í Morgunblaðinu í dag.

Samtök atvinnulífsins og Eflingu greinir enn á um launakröfur Eflingar. Formaður Samiðnar segir hins vegar viðræður iðnaðarmanna „þokast í rétta átt“ og síðdegis í dag kemur í ljós hvort þeirri deilu verður vísað til sáttasemjara.

VR stefnir einnig að verkfallsaðgerðum sem nánar verða útlistaðar í þessari viku. Gert er ráð fyrir kosningu um þær öðrum hvorum megin við helgina. Félagið vinnur líka í samstarfi við Eflingu, Verkalýðsfélag Akraness og Verkalýðsfélag Grindavíkur að aðgerðaáætlun sem verður kynnt á föstudaginn. Fyrstu aðgerðir munu áfram beinast að fyrirtækjum í ferðaþjónustunni en lögð eru drög að aðgerðum á fleiri sviðum atvinnulífsins. Vilhjálmur Birgisson, formaður VLFA, útilokar ekki að hans félagsmenn taki þátt í þeim aðgerðum sem verða kynntar á föstudaginn.

Hörður Guðbrandsson, formaður VLFG, segir félagsmenn sína ekki taka þátt í þessum aðgerðum, en félagið muni líklega eiga aðild að aðgerðum á seinni stigum.

Erlendar ferðaskrifstofur lýsa yfir áhyggjum vegna fregna um yfirvofandi verkföll.

Tengdar fréttir

Kjaraviðræður

Þarf að koma til móts við ólíkar þarfir lækna

• Þung staða í kjaradeilu kennara
• Reiðubúin að aflýsa verkföllum í fjórum leikskólum
• Boða verkföll í 10 leikskólum til viðbótar
• Viðræður ekkert þokast frá því á þriðjudag

» Fleiri tengdar fréttir