Innlent | mbl | 28.2.2019 | 22:09 | Uppfært 1.3.2019 5:13

Traust til Alþingis minnkar mjög

Frá Alþingi á dögunum. Hlutfall þeirra sem segjast bera mikið traust til Alþingis dregst saman um 11 prósentustig á milli ára. mbl.is/Hari

Fæstir segjast bera mikið traust til borgarstjórnar Reykjavíkur og Alþingis í nýjum Þjóðarpúlsi Gallup, þar sem traust almennings til ýmissa stofnana og embætta er mælt. Einungis 18% segjast bera mikið traust til Alþingis, en Landhelgisgæslan, forsetinn og lögreglan njóta mests trausts.

Þetta kemur fram í nýjum Þjóðarpúlsi Gallup, sem fjallað var um í kvöldfréttum RÚV í kvöld en mikið hefur verið rætt á liðnum árum um mikilvægi þess að auka traust til stjórnmálanna og er meðal annars kveðið á um það í stjórnarsáttmála ríkisstjórnarinnar.

Landhelgisgæslan, embætti forseta Íslands og lögreglan eru öll með mikið traust hjá almenningi, en yfir 80% segjast bera mikið traust til þessara stofnana eins og undanfarin ár.

Frétt af mbl.is

Landhelgisgæslan nýtur mests trausts

Hægt er að glöggva sig á tölunum hér að neðan og sjá samanburð við árið 2018. Alþingi fellur um 11 prósentustig í könnuninni á milli ára. Borgarstjórn Reykjavíkur fellur einnig um átta prósentustig niður í 16%.

Mest eykst traustið til dómskerfisins, en 47% segjast bera mikið traust til þess, samanborið við 36% í fyrra.

Könnun Gallup var gerð dagana 7.-20. febrúar, heildarúrtaksstærð var 1.424 einstaklingar og 54,3% þeirra tóku þátt í könnuninni.