Skoðun og sýnataka í Fossvogsskóla leiddi í ljós að raka- og loftgæðavandamál voru til staðar í skólanum en bæði nemendur og starfsfólk skólans hafa kvartað undan einkennum vegna þessa. Í ljósi þess hefur verið tekin ákvörðun um að loka skólanum eftir að skóladegi lýkur á miðvikudaginn kemur.

Um er að ræða varúðarráðstöfun á meðan endurbætur fara fram svo hægt sé að opna Fossvogsskóla að nýju í haust. Ákvörðunin er tekin á grundvelli skýrslna, með hliðsjón af áætlun um þær framkvæmdir sem ráðast þarf í og eftir samráð skólastjórnenda, fulltrúa foreldra, skólaráðs, heilbrigðiseftirlitsins, umhverfis- og skipulagssviðs borgarinnar og skóla- og frístundasviðs. Þetta kemur fram í tilkynningu frá Reykjavíkurborg.

Um tólf vikur eru eftir af skólaárinu og þarf því að finna pláss fyrir þá 352 nemendur sem eru í Fossvogsskóla. Nemendur í 4. bekk munu vera áfram í lausum kennslustofum á lóðinni en verið er að útvega húsnæði fyrir 1.-3. bekk og 5.-7. bekk. Það mun liggja fyrir á næstu dögum en markmiðið er að finna húsnæði sem næst Fossvoginum fyrir yngri börnin en útvega skólaakstur fyrir eldri nemendur ef þess þarf.

Hefðbundið skólastarf mun því fara fram í Fossvogsskóla frá mánudegi til miðvikudags en skipulagsdagar skólans verða færðir til fimmtudags og föstudags í þessari viku og kennsla því falla niður. Mánudaginn 18. mars mun kennsla hefjast að nýju. Foreldrum verður tilkynnt nánar um staðsetningu um leið og hún liggur fyrir.

Að loknu sumarleyfi mun endurbótum verða lokið og nemendur geta snúið aftur í Fossvogsskóla. Borgaryfirvöld munu vinna áfram að málinu í nánu samráði og samstarfi við skólastjórnendur, starfsfólk og foreldra.

Tengdar fréttir

Mygla í húsnæði

Ekkert skilið eftir nema útveggirnir

• Stefndi skólanum vegna vinnuumhverfis
• Tölvupóstarnir fóru „í svarthol“ í Borgartúni
• Myglan hefur áhrif á verð og sölu
• Landsvirkjun selur höfuðstöðvarnar

» Fleiri tengdar fréttir

• 1 blogg um fréttina

Bloggað um fréttina

• Jóhannes Laxdal Baldvinsson: Mygla er eðlileg