Frjáls verslun með áfengi skjóti skökku við

Krabbameinsfélag Íslands segir það skjóta skökku við að nú sé til umræðu að leyfa frjálsari verslun með áfengi. „Verði frumvarp sem lagt hefur verið fram á Alþingi samþykkt verður það aðgerð sem vinnur stórlega gegn markmiðum nýsamþykktrar krabbameinsáætlunar,“ segir í yfirlýsingu félagsins.

Þar segir að í lok janúar hafi heilbrigðisráðherra samþykkt tillögur að íslenskri krabbameinsáætlun þar sem fyrsti liður fjallar um aðgerðir til að minnka líkur á krabbameinum.

„Lengi hefur verið vitað að neysla áfengis eykur líkur á krabbameinum í munnholi, koki, barkakýli, vélinda, lifur, brjóstum, ristli og endaþarmi. Áfengi veldur til dæmis 5% brjóstakrabbameina og 3% krabbameina í ristli og endaþarmi á Norðurlöndum.“

Miðað við óbreyttar drykkjuvenjur á Norðurlöndunum megi búast við að áfengisneysla muni valda 83 þúsund krabbameinstilfellum næstu 30 árin. Myndi drykkja minnka og helmingur þeirra sem drekka eitt til fjögur glös af áfengi á dag myndi hætta að drekka áfengi væri hægt að koma í veg fyrir 21.500 tilvik.

„Aftur á móti hefur verið sýnt fram á að þegar sala áfengis er gefin frjáls þá eykst neyslan til muna.“

Í yfirlýsingu Krabbameinsfélagsins segir að ákvarðanir stjórnvalda hljóti alltaf að byggja á helstu þekkingu. „Augljóst er að ekki fer saman að Alþingi leyfi frjálsari verslun með áfengi, sem mun meðal annars fjölga dauðsföllum, sjúkdómum og kostnað í heilbrigðiskerfinu á sama tíma og vinna á eftir nýrri íslenskri krabbameinsáætlun og lýðheilsuáætlunum með forvarnir að leiðarljósi.“

„Stjórnvaldsaðgerðir hafa skipt sköpum í þeim árangri sem Íslendingar hafa náð í tóbaksvörnum og vekur þessi árangur athygli á heimsvísu. Lærum af reynslunni og vinnum að betri lýðheilsu, til dæmis með aðgangstakmörkunum og skattlagningu.“

• 1 blogg um fréttina

Bloggað um fréttina

• Þorsteinn Siglaugsson: Sælgætið í ÁTVR